-
Nga:
Valbona Bytyqi
- 15 dhjetor 2020 18:22
- Shpërndaje në:
Ndërhyrjen e Zyrës së Bashkimit Evropian në Serbi është detyruar ta kërkojë Ministria e Punëve të Jashtme, lidhur me arrestimin e dy qytetarëve të Kosovës në afërsi të pikëkalimit kufitar në Merdarë.
Përmes një komunikate për media, tri ditë pas arrestimit të Blerim Maqastenës e Berat Mexhuanit, MPJD-ja e ka kritikuar palën serbe për vonesë në dhënien e informacioneve lidhur me rastin.
Më tutje, nga kjo ministri kanë bërë thirrje që nga shtetasit kosovarë të evitohet qarkullimi afër territorit të Serbisë.
Por, kaq i ashpër lidhur me arrestimin e qytetarëve të Kosovës, njërit prej së cilëve i është caktuar edhe masa e paraburgimit prej 30 ditësh, nuk ka qenë shefi i Qeverisë, Avdullah Hoti.
“Zyra jonë ndërlidhëse në Beograd është marrë, i ka ndjekë procedurat për qytetarët e Kosovës që janë arrestuar gjoja në pjesën serbe. Unë besoj që shumë shpejt do të kemi informata të detajuara”.
E me reagimin e institucioneve të Kosovës nuk janë të kënaqur nga Partia Socialdemokrate, përfaqësues i së cilës në Kuvendin Komunal të Podujevës është njëri nga të arrestuarit Blerim Maqastena.
“Nuk mund të kalojë në heshtje dhe të normalizohet një sjellje kaq e padrejtë e Serbisë, e cila nuk është hera e parë që po ndodh. Ne po presim që ata të reagojnë e jo vetëm reagime kështu farsë por të merren me shumë seriozisht me të gjithë mekanizmat që i kanë që Blerimi sa më shpejt të kthehet në Kosovë dhe të mos mbahet atje pa nevojë dhe paarsye”, tha Nol Nushi, anëtar i PSD-së.
Sipas Policisë së Kosovës, asamblisti i PSD-së, Blerim Maqastena dhe shoku i tij Berat Mexhuani, të cilët kanë qenë në afërsi të fshatit Mirovc, si pasojë e mjegullës kanë dalë në territorin serb. Pas marrjes së informatave, Policia e Kosovës e ka informuar palën tjetër në kufi, nga e cila është konfirmuar se Maqastena dhe Mexhuani janë ndaluar nga autoritetet serbe. Për ta nuk janë dhënë detaje shtesë.