Kosova do të vazhdojë të mbetet nën ndikimin e kushteve pothuajse të ngjashme meteorologjike me ditët e fundit.
Sipas Institutit Hidrometeorologjik të Kosovës, sot moti pritet të jetë i vranët dhe me intervale me diell.
“Në fushat barike pritet të ketë rënie të lehta, temperaturat minimale parashihen të lëvizin ndërmjet 3-7 gradë celsius, ndërsa maksimalet e ditës parashihen të lëvizin ndërmjet 12-22 gradë celsius”, thuhet në njoftim.
IHMK-ja thotë se indeksi UV do të jetë në vlera të rritura, ndërsa kushtet biometeorologjike dhe agrometeorologjike do të jenë të favorshme për shkak të numrit të mjaftueshëm të orëve me diell dhe reshjeve të fundit.
“Do të fryjë erë kryesisht nga juglindja herë-herë me vrull, shpejtësia maksimale në veri të Dukagjinit mund të arrijë deri 20 m/s, ndërsa pjesa më e madhe e rrafshit të Kosovës, shpejtësinë e erës mund ta arrijë deri 12 m/s”, përfundon njoftimi.
