Instituti Hidrometeorologjik i Kosovës paralajmëron se dhjetëditëshi i dytë i muajit janar do të kushtëzohet me kushte të paqëndrueshme meteorologjike. Kjo situatë e motit do të krijohet për shkak të masave të ajrit me presion të ulët atmosferik.
Vranësirat fillimisht do të shoqërohen me riga të dobëta shiu për të rikthyer më tej në reshje mesatare dhe të dendura bore.
“Nga kushtet klimatike dhe relievit që ka vendi ynë, reshjet nuk do të jenë me intensitet të njëjtë në gjithë territorin. Më të theksuara priten të jenë në pjesën veriore të Dukagjinit dhe viseve të larta malore, mirëpo reshjet e borës nuk do të mungojnë edhe në viset mesatare dhe ato të ulëta”, thuhet nga Instituti.
Temperaturat minimale do të sillen mes -8 dhe -2 gradë Celsius, ndërsa maksimalet -1 deri 3 gradë Celsius.
“Ky mot me këto temperatura do të krijojë ngrica si në viset e ulëta, po ashtu edhe në viset e larta, prandaj u rekomandohet ngasësve të automjeteve të kenë kujdes të shtuar në komunikacion. Prezenca e rrezeve të diellit nga dita e enjte do të krijojë kushte që të krijohet mjegulla e dendur pothuajse në të gjithë territorin. Gjithashtu era nga drejtimi i veriut dhe verilindjes e cila do të jetë e lehtë dhe lokalisht e fortë do ta mbajë ketë gjendje termike e cila do t'i ngjasojë stinës që jemi”, thuhet nga Instituti.
