Mogherini: Ura do t’i bashkojë të dy komunitetet

Shefja e diplomacisë evropiane, Federica Mogherini ka thënë të shtunën në Mitrovicë se po i sheh punimet që po ecin mirë në urën e lumit Ibër.

“Ura do t’i bashkojë të dy komunitetet nga veriu dhe jugu. Ky nuk është rezultat i alienëve, por i njerëzve. Është rezultat i bisedimeve nga vendimmarrësit e dy shteteve në Bruksel”, ka thënë ajo.

Ajo tha se është e lumtur me atë që është arritur pasi sipas saj më në fund ka kuptim të ndërsjellë mes palëve.

Tutje përfaqësuesja e lartë e BE-së tha se ata do të mbështesin qytetarët në të dy anët e urës. Ndërsa nuk dha ndonjë datë për revitalizimin e saj, duke thënë se ai do të bëhet së shpejti.

Mogherini ka takuar edhe kryetarin e Komunës së Mitrovicës së Veriut, Goran Rakiq.

E pranishme ishte edhe shefja e Zyrës së BE-së në Kosovë, Nataliya Apostolova.