Ministri i Mjedisit dhe Planifikimit Hapësinor, Fatmir Matoshi, sot ka marrë pjesë në shënimin e 22 Marsit, Ditës Ndërkombëtare të Ujit dhe 23 marsit - Ditës Ndërkombëtare të Meteorologjisë e organizuar në Liqenin e Batllavës, njofton kumtesa, transmeton Koha.net.
Me këtë rast, Matoshi dha një mesazh për institucionet e vendit dhe qytetarët e Republikës së Kosovës, për ruajtjen dhe shfrytëzimin racional të ujit në vendin tonë.
“Është momenti që të gjithë ta trajtojmë ujin ashtu siç duhet sepse nënkupton jetë dhe si vend kemi nevojë shumë të madhe që të ruajmë sasinë e ujit , ta shfrytëzojmë në mënyrë sa më racionale të kujdesemi si institucione të kemi rezerva ujore për vendin tonë sepse secili prej jush e di, se vendi ynë është me rezervat më të pakta ujore në gjithë Evropën”, deklaroi ai.
“Motoja e këtij viti që është “Ujë për të gjithë” na obligon që të punojmë në këtë drejtim. Ju lus që të punoni sa më shumë, të na ndihmoni sa më shumë, që të dërgoni sa më shumë mesazhe tek të gjithë për rëndësinë që ka uji, për rëndësinë që duhet ti kushtojmë ruajtjes së rezervave ujore dhe për rëndësinë e ujit të pastër në mënyrë të veçantë”, shtoi Matoshi.
Sot është shënuar edhe festivali i liqenit ku është bërë promovim i rëndësisë së ujit me lojëra për fëmijë, gara me vizatime dhe ese në mes nxënësve me temën “Ujë për të gjithë”, ekspozita të punimeve të vizatimeve të nxënëseve nga SHFMU- të, si dhe punime nga materialet e riciklueshme si dhe vendosja e 4 pikave demonstrimi i metodës së 3R- Redukto, Ripërdor, Riciklo për ngritjen e edukimit dhe ndërgjegjësimit.
Në shënim të kësaj dite, është organizuar edhe një tryezë në të cilën janë prezantuar të arriturat dhe sfidat në fushën e ujërave në Kosovë.