Tre vjet në pritje të ripërtëritjes së dokumenteve të Kosovës

Problemet me të cilat ballafaqohen mërgimtarët për t’u pajisur me dokumente nëpër ambasadat e Kosovës janë të shumta. Njëri prej mërgimtarëve, me banim në Londër, është ankuar se tash e tre vjet nuk po arrin që të vazhdojë vlefshmërinë e pasaportës dhe të dokumenteve të tjera. Për rastin ai i ka njoftuar të gjitha institucionet, përfshirë Ministrinë e Punëve të Jashtme dhe Diasporës, porse sqarime ka thënë se nuk ka marrë

Janë mbushur tre vjet që kur një mërgimtar nga Anglia ka aplikuar për ripërtëritjen e dokumenteve të Kosovës nëpërmjet Ambasadës së Kosovës, porse nuk ka marrë përgjigje.

Xhemajl Bytyqi, i cili jeton në Londër, është ankuar se tash e tre vjet gruaja e tij, Vlora Bytyqi, nuk po mund ta vazhdojë vlefshmërinë e pasaportës së saj të Kosovës. Ai ka thënë se për rastin i ka njoftuar të gjitha institucionet, përfshirë Zyrën e kryeministrit, porse deri tash nuk i është bërë zgjidhje.

“Gruas i ka skaduar afati i pasaportës dhe i letërnjoftimit. Kur kemi shkuar në Ambasadë për ta vazhduar, na kanë thënë se duhet kërkuar një dëshmi se ka lindur në Pejë. Por ajo e ka pasaportën e Kosovës, letërnjoftimin dhe certifikatën e martesës. Kemi kërkuar sqarime me shkrim prej Ambasadës në Londër, por kurrfarë përgjigjeje nuk kemi marrë”, ka thënë Bytyqi.

Në lidhje me rastin, KOHA ka adresuar pyetje në Ministrinë e Punëve të Jashtme dhe në Ambasadën në Londër, porse përgjigje nuk ka marrë.

Një burim i ka thënë KOHËS se tashmë shtatë muaj nuk ofrohen shërbime konsullore në Londër, për shkak të mungesës së zyrtarit përgjegjës.

Bytyqi ka fajësuar edhe Komunën e Pejës për neglizhencë në dhënien e dokumentacionit të kërkuar. Zyrtarët në këtë Komunë kanë thënë se nuk janë në dijeni për rastin, teksa kanë përmendur rrugët ligjore që palët mund t’i ndjekin.

“Nëse nuk arrin ta marrë, le ta lypë vendimin pse s’po e merr, le ta lypë përgjigjen në vendim se pse nuk ka mundur ta realizojë. Le të ankohet në instanca të tjera. Për mua është rast i panjohur. Janë procedura që i rregullon tjetër kush”, ka thënë Shefqet Thaçi, menaxher i sektorit të gjendjes civile në Komunën e Pejës.

“Nëse ajo ka prova materiale për ta marrë shtetësinë e Kosovës, ka forma të tjera që mundet të aplikojë dhe për gjithçka mund të marrë përgjigjen negative, në afat ligjor. Nëse mendon se iu ka bërë e padrejtë, është instanca e Ministrisë së Punëve të Brendshme që vendos dhe kryhet si lëndë”, ka shtuar ai.

Kjo nuk është hera e parë që mërgimtarët ankohen për vonesa në marrjen e dokumenteve të Kosovës. Ankesat ishin shtuar në periudhën kur Ministria e Jashtme kishte shkëputur kontratën me kompaninë që e bënte shpërndarjen e dokumenteve nëpër ambasada dhe konsullata. KOHA ka raportuar se pasi Donika Gërvalla e mori drejtimin e Ministrisë, ajo kishte vendosur që rolin e postierit ta kryente vetë Ministria, duke mos kontraktuar kompani postare. Kjo ishte bërë nëpërmjet angazhimit të shoferëve që t’i shpërndanin dokumentet nëpër ambasada dhe konsullata. MPJD-ja kishte pasur edhe një kontest gjyqësor me kompaninë që ofron këto shërbime - DHL. Megjithëkëtë, kontesti me borxhin prej 60.000 eurosh nuk e ka penguar Ministrinë e Punëve të Jashtme që ta përzgjedhë kompaninë e njëjtë për ofrimin e shërbimeve postare.