Mbyllja e rrugës për festa, kaos trafiku nëpër Prishtinë

Kryeqyteti të shtunën ka nisur përgatitjet për festat e fundvitit. Për këtë synim, Komuna e Prishtinës ka vendosur që për më shumë se një muaj ta mbajë të mbyllur për qarkullimin e veturave rrugën nga Katedralja deri te “Grandi”. Përderisa disa qytetarë e mirëpritën këtë ndryshim, disa të tjerë shprehën pakënaqësi për kolonat e veturave që u krijuan në rrugët lidhëse. Në Komunë kanë thënë se mbyllja e rrugëve do të shërbejë edhe si fazë testuese për projektin e zgjerimit të sheshit

Me dhjetëra shtëpiza janë bartur të shtunën në kryeqytet me qëllim të përgatitjes së kryeqytetit për festat e fundvitit. Por, për dallim prej viteve të tjera, lokacioni i tyre është ndryshuar. Kanë zënë vend në mes të rrugës “Xhorxh Bush”.

Me qëllim të dekorimeve, Komuna e Prishtinës ka njoftuar ditë më parë se prej të shtunës e deri më 8 janar të vitit të ardhshëm, rrugët nga Katedralja deri në drejtimin e hotelit “Grand” do të jetë të mbyllur për qarkullimin e veturave.

Në ditën e parë të zbatimit të vendimit, mbyllja e rrugës ka shkaktuar trafik të ngjeshur përgjatë rrugëve lidhëse. E kjo ka nxitur pakënaqësinë e ngasësve.

Muhamet Ajvazi, teksa ka pritur në kolonë, ka thënë se ky bllokim i rrugës do ta pengojë qarkullimin e lirë.

“Kjo rrugë ka qenë gjithmonë që kemi qarkulluar pa probleme. Tash shohim tollovi. Sot ditë vikendi e jo më ditë pune kur të fillojë prej së hënës”, ka thënë Ajvazi.

Edhe Arbëri 29 nën 2022 Nisin ndryshimet infrastrukturore në rrugën “Xhorxh Bush”, opozita me dyshime

Por ecjen në shëtitoren tashmë të zgjatur dhe me atmosferë festive e kanë mirëpritur këmbësorët.

Lendita Gashi ka thënë se ka shijuar këtë pjesë të rrugës për të lëvizur lirshëm.

“Po, po duket që është duke u përshtatur shumë vazhdimësia e sheshit. Është shumë ndjenjë e mirë me pasë më shumë hapësirë, ku njerëz kanë me qarkulluar në mënyrë më të lirshme dhe mos me u pengu prej veturave”, ka thënë Gashi.

E Ilire Imeri ka shprehur brengë për tollovinë që mund t’u shkaktohet veturave.

“Me të thënë të drejtën shumë mirë për ne shëtitoret, ama për komunikacion nuk e di. Pak e mundimshme”, ka thënë qytetarja tjetër, Imeri.

Edhe Arbëri 13 kor 2026 Drojë se zgjatja e sheshit deri te Rrethi me Flamur do të bllokojë më shumë Prishtinën

Por, pati edhe nga ata që patën mendim të kundërt dhe që shprehën ankesa në adresë të Komunës.

Hetem Salihu e ka quajtur këtë vendim të palogjikshëm.

“Shumë pa lidhje po më doket. Nuk pe di pse e kanë mbyllur bilës. Nuk e di qysh mundem ma e ba zgjidhjen kur aty si të kalon Pallatin e Rinisë e Rilindjen, aq bahet ngushtica, sa që shumë e palogjikshme po më duket”, ka thënë Salihu.

Në Komunën e Prishtinës kanë thënë se bllokimi i rrugës është bërë më herët me qëllim që të kryhen intervenimet e planifikuara para 12 dhjetorit, kur do t’i nisin aktivitetet festive.

Edhe Arbëri 23 tet 2024 Qytetarët ironizojnë me “zgjidhjen” e kryetarit Përparim Rama për rrëmujën në trafik

Ilirik Musliu, drejtor i Shërbimeve Publike në Komunën e Prishtinës, ka konfirmuar se ky vendim do t’i shërbejë edhe projektit për zgjerimin e sheshit.

“Realisht edhe është një prej arsyeve ndoshta edhe pjesa e sheshit. Ju e dini, testimet të cilat i kemi bërë me unazën qendrore është blloku kjo pjesë. Realisht përveç kësaj pjese, është blloku edhe rruga ‘Garibaldi’, e tani është pak më ndryshe. Mirëpo gjithsesi po edhe kjo na jep realisht disa informata, disa të dhëna për projektin i cili është një projekt ma i madh dhe i së ardhmes”, ka thënë Musliu.

Në kuadër të dekorimeve për festa, drejtori i Shërbime Publike ka njoftuar se ndriçimet do të bëhen me drita efiçiente, siç është kërkuar nga Qeveria. E të shtunën, krahas dekorimeve për festa të fundvitit, kryeqyteti është dekoruar edhe për festën e 28 Nëntorit.