ATK-ja sot ka njoftuar se gjatë periudhës janar-tetor të këtij viti ka arritur të mbledhë të hyra prej 512 milionë euro, që është një rritje prej 122 milionë euro për dallim nga viti i kaluar e mbi 80 milionë euro krahasuar me vitin 2019.
Drejtori i ATK-së, Ilir Murtezaj, për emisionin “60 Minuta” në KTV ka treguar se të dhënat janë të shkëlqyera dhe tregojnë një efikasitet të madh në inkasimin e borxheve, ku janë inkasuar borxhe rreth 50 milionë euro më tepër se vitin e kaluar e 40 milionë më tepër se vitin 2019.
“Është një nga faktorët për rritjen e të hyrave, pasi është afro 8 për qind e të hyrave totale”, ka thënë Murtezaj.
Murtezaj ka thënë se fenomeni i moslëshimit të kuponëve fiskalë vazhdon të jetë problem.
Ai ka treguar se gjatë periudhës korrik-shtator janë gjobitur rreth 8000 biznese për moslëshim të kuponave.
Edhe
Gastronomia e shëndetësia në krye të sektorëve që nuk lëshojnë kuponë fiskalë
“Përkundër se me ligjin e rimëkëmbjes ekonomike norma tatimore është zvogëluar për sektorin e shërbimeve të gastronomisë e hotelerisë, nuk ka prodhuar kjo efekt në përmirësim apo formalizim të tërësishëm të tregut në këtë sektor dhe kjo është faktuar nga veprimet tona në terren në korrik, gusht e shtator. Fatkeqësisht është arritur të identifikohen mbi 8000 biznese që nuk kanë lëshuar kupona dhe jemi detyruar të aplikojmë masa ndëshkuese”, ka thënë Murtezaj.
Murtezaj ka thënë se ATK-ja po shqyrton të organizojë një lojë shpërblyese me kupona fiskal si herën e kaluar, kur rimbursonte qytetarët.
Në herën e kaluar ka thënë se nuk ishte shumë e suksesshme fushata, pasi nuk solli efektin e nevojshëm e kishte shpenzime.
“Ditëve në vijim do të shohim të dakordohemi për një formë të re të lojës shpërblyese. Forma e fundit kishte kosto e nuk jepte efektin e mjaftueshëm në nxitje të lëshimit të kuponave fiskalë”, ka thënë Murtezaj.
Edhe
ATK-ja gjobit me 41 mijë euro klubet e natës për moslëshim të kuponëve fiskalë
Ai ka treguar se mbi 17 mijë biznese janë deklaruar nëpërmjet sistemit EDI se janë biznese që nuk obligohen të fiskalizohen e 35 mijë janë biznese të fiskalizuar tashmë.
ATK-ja ka paralajmëruar kontrolle njëherit për bizneset me punëtorë informalë.
