MASHTI akuzon kryetarin e Vitisë se për shkaqe politike bojkotoi përurimin e shkollës

Zëvendësministri i Arsimit, Arsim Ademi, e ka akuzuar kryetarin e Komunës së Vitisë, Sokol Haliti, se qëllimshëm bojkotoi përurimin e shkollës fillore “Halit Alidema” në Pozheran, duke u shprehur se ai ka dëshirë të sëmurë për protagonizëm.

Ai ka shkruar në Facebook se bojkoti i Halitit është vendim politik “për qëllimi të fushatës elektorale dhe i pabazuar në gjendjen reale të objektit të ri të shkollës”.

“Kjo do duhej të ishte një ditë feste për nxënësit, mësimdhënësit dhe qytetarët pozheranas. Por, kjo festë u prish sot nga kryetari i Komunës. Me të marrë njoftimin nga ne, ai në vend se të fillonte përgatitjet për ceremoninë e përurimit, kishte mbledhur një grup politik dhe kishte marr vendim që mësimi të vazhdonte në shkollën e vjetër ashtu si më parë, dhe që të bojkotohej përurimi i shkollës. Sigurisht që ky është një vendim politik, për qëllime të fushatës elektorale, dhe i pabazuar në gjendjen reale të objektit të ri të shkollës. Jemi të sigurt se, nëse nuk do të paralajmërohej përurimi, sot nxënësit pozheranas do të fillonin mësimin në shkollën e re. Por dëshira e sëmurë e kryetarit Haliti për protagonizëm i la edhe këtë javë nxënësit në shkollën e vjetër”, ka thënë ai në Facebook.

Sipas Ademit, shkolla është e gatshme për shfrytëzim dhe Komisioni Vlerësues kishte konstatuar se me të “gjithë vërejtjet e vogla që ishin konstatuar, mësimi mund të fillonte”.

“Me gjithë vështirësitë dhe pengesat e llojllojshme, tani më kjo  shkollë është e gatshme, dhe komisioni vlerësues kishte konstatuar që me gjithë vërejtjet e vogla që ishin konstatuar mësimi mund të fillonte, ndërkohë korigjimet e kërkuara do të bëheshin deri në fund të kësaj jave”, ka shtuar zëvendësministri.

Sot ka reaguar edhe kryetari Haliti në Facebook. Ai ka thënë se ka vizituar objektin e shkollës dhe atë çerdhes, ku është konstatuar se punimet po zhvillohen.