Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoMolliqaj prezanton programin e PSD-së: Demokracia dhe shteti social në qendër
Udhëheqësi i listës së Partisë Socialdemokrate (PSD), Dardan Molliqaj, ka shpalosur prioritetet kryesore me të cilat kjo parti synon të sigurojë përfaqësim në Kuvendin e Kosovës pas zgjedhjeve të 7 qershorit.
Sipas Molliqajt, demokracia, taksa progresive, shëndetësia, arsimi dhe siguria në vendin e punës përbëjnë shtyllat kryesore të programit të PSD-së.
Duke folur për sektorin e shëndetësisë, ai shprehu kundërshtimin e PSD-së ndaj ligjit për sigurimet shëndetësore, duke argumentuar se modeli i bazuar në sigurime rrezikon të përjashtojë një numër të madh qytetarësh nga qasja në shërbime.
“Ne besojmë se ligji për sigurimet shëndetësore do të bëhet problem. Parimi ynë bazë është se sa më private të jetë shëndetësia, aq më e shtrenjtë bëhet. Përvoja ndërkombëtare tregon se vendet me sisteme më publike të shëndetësisë ofrojnë shërbime më cilësore dhe më të qasshme për qytetarët”, ka thënë Molliqaj në “Zgjedhjet në KOHË”.
Ai shtoi se PSD-ja e kundërshton këtë ligj pasi, sipas tij, rreth gjysmë milioni qytetarë që nuk janë të punësuar do të mbeteshin jashtë përfitimeve që ofron sistemi i sigurimeve shëndetësore.
Molliqaj theksoi se PSD-ja synon një sistem shëndetësor publik dhe universal, ku qasja në kujdesin shëndetësor të mos kushtëzohet nga statusi i punësimit apo mundësitë financiare të qytetarëve.
Molliqaj: Ne jemi opozita e vetme
Udhëheqësi i listë së Partisë Socialdemokrate, Dardan Molliqaj, ka thënë se ata janë opozita e vetme e Lëvizjes Vetëvendosje.
“Ma mirë me na qujtë argatë të pushtetit se ashtu edhe mundesh me më thanë po s’mundesh me na thanë opozitë e opozitës sepse nuk ka opozitë të opozitës. Ne nuk jemi (argatë të pushtetit), por ajo kish pas kuptim logjik, kjo tjetra s’ka kuptim logjik. S’ka opozitë të opozitës, veç kur s’ka opozitë tingëllon qashtu, në fakt ne jemi opozita, jo pse zgjedhim të jemi vetë, por nuk ka tjetër”, ka thënë Molliqaj në emisionin “Zgjedhjet në KOHË”.
Tutje Mollqaj ka shtuar se përkundër se opozita e tanishme ka hedhur kritika në drejtim të Qeverisë Kurti, ajo përsëri po deklarohet e gatshme për bashkëpunim.
Sipas tij, ato duhet të kenë vija të kuqe për të.
“Kauza e ardhshme nuk është antikorrupsioni, është kryer ajo fazë. Në vendet ku po shkojmë edhe globalisht por edhe lokalisht demarkimi duhet të jetë demokracia, nëse beson në demokraci nuk mund të bësh koalicion me dikë që është antidemokratik. Vijat e kuqe nuk janë as luks as naivitet, vijat e kuqe në politikë bëhen në domosdoshmëri kur nuk ka demokraci, kur ka korrupsion të madh, ku ka kriminalitet të madh”, ka thënë ai.
Kryetari i PSD-së tutje ka shtuar se nga demokracia, Kosova është duke shkuar drejt rrugës së autoritarizmit.