Luan Hoti emërohet kryeshef i “Stacionit të Autobusëve” në Prishtinë

Komuna e Prishtinës në bashkëpunim me Ambasadën e Mbretërisë së Bashkuar kanë zgjedhur kryeshefin e ndërmarrjes publike “Stacioni i Autobusëve”.

Këtë e ka bërë të ditur vetë komuna nëpërmes një postimi në rrjetet sociale, kur ka treguar se për këtë post është zgjedhur Luan Hoti, transmeton koha.net.

Ata kanë shkruar:

“Përfundon me sukses zgjedhja e Kryeshefit të ri të NPL "Stacioni i Autobusëve"

Është përmbyllur suksesshëm procesi i përzgjedhjes së Kryeshefit të ri të Ndërmarrjes Publike Lokale “Stacioni i Autobusëve”.

Bordi i Ndërmarrjes dhe përfaqësuesit e Ambasadës së Mbretërisë së Bashkuar vlerësuan se i tërë procesi ka qenë i organizuar shumë mirë, me transparencë të plotë, dhe janë përzgjedhur më të mirët. Edhe paneli vlerësues, edhe përfaqësuesit e Ambasadës, kanë radhitur njësoj kandidatët që janë intervistuar.

Si rrjedhojë, në fund të këtij procesi, më së shumti pikë mori kandidati Luan Hoti. Ai tashmë është zgjedhur Kryeshef i NPL “Stacioni i Autobusëve”.”