U thirr si takim i liderëve, por Shpend Ahmeti ishte i vetmi lider politik në takimin e së mërkurës në një nga hotelet e Prishtinës.
Ky takim i paralajmëruar nga presidenti, e i organizuar nga shoqëria civile, në tentim të arritjes së një konsensusi për dialogun, vetëm sa vuri edhe më shumë në pah ndarjet mes pushtetit e opozitës, raporton KTV.
Partitë opozitare thonë se presidentit i ka munguar guximi që të thërrasë vetë takimin duke e ditur refuzimin që do t’ia bënte opozita.
Deputeti i LDK-së, Ismet Beqiri, i ka quajtur blerje kohe këto takime, madje ka thënë se në të tilla nuk duhet të shkohet fare.
Deputetja e Vetëvendosjes, Albulena Haxhiu, ka thënë se tryezat e mbyllura janë të papranueshme.
Ajo ka paralajmëruar se Vetëvendosje nuk do të marrë pjesë asnjëherë në tryeza të tilla, që i shkojnë për shtati presidentit e Qeverisë.
Ndërkohë, LDK-ja tash e sa kohë ka paralajmëruar se do të thërrasë tryezën përmbyllëse të partive politike, meqë asnjë nga të katër tryezat që janë organizuar deri tash, nuk ka sjellë rezultate.
Por, AAK-ja thotë se për këtë nuk mund të pyetet një parti.
Ndërkohë, LDK-ja ka paralajmëruar shumë zhvillime për shtator.
Radha për tryezën e partive kalon tek AAK-ja, pas LDK-së, PDK-së, Vetëvendosjes e PSD-së.