Ministri i Shëndetësisë, Rifat Latifi ka vizituar të premten qendrën e vaksinimit “1 Tetori” në Prishtinë, për tu njoftuar nga afër me procesin e vaksinimit anti-COVID-19.
Ai ka falënderuar të gjithë ata që po merren me procesin e vaksinimit.
Latifi ka thënë me këtë rast se çdo vaksinë e dhënë është një jetë e shpëtuar.
“Ju falënderoj të gjithëve për punën që po bëni. Çdo vaksinë e dhënë është një jetë e shpëtuar dhe ju po shpëtoni shumë të tilla” u tha Ministri ekipeve të vaksinimit.
Ministria e Shëndetësisë njofton se gjatë qëndrimit në ‘1 Tetori’ ministri pati rast të bashkëbisedojë edhe me qytetarë të grupmoshave të ndryshme që kishin ardhur për vaksinim, përfshirë këtu edhe fëmijë dhe shtetasë të huaj, të cilët i përgëzoi për vendimin e drejtë për t’u vaksinuar, në këtë kohë kur pandemia nuk ka përfunduar ende dhe vaksinimi mbetet mundësia kryesor për mbrojtje nga virusi.
Ministri Latifi ka thënë se krijimi i të gjitha mundësive për vaksinim, me vaksina të mjaftueshme dhe të sigurta, pa terminë dhe gjithashtu edhe përmes ekipeve mobile, duhet shfrytëzuar nga qytetarët, për të parandaluar situata të vështira epidemiologjike dhe valë të rënda të pandemisë prej të cilave ka vuajtur shumë edhe Kosova.
