Kur do të hyjë Kosova në Rrjetin Trans-Evropian të transportit hekurudhor

Përmes Kornizës së Investimeve për Ballkanin Perëndimor, Bashkimi Evropian ka ndarë 38.5 milionë euro për fazën e parë të investimeve për rivitalizimin e hekurudhave të Kosovës.

Kjo marrëveshje përfshin edhe dy faza të tjera. I gjithë investimi arrin vlerën e 200 milionë eurove, i cili pritet t’i modernizojë hekurudhat e Kosovës.

Zyrtarë të BERZH-it kanë thënë se përmes këtij investimi, Kosova do të hyjë në Rrjetin Trans-Evropian të transportit.

Për shkak të linjave të rralla dhe gjendjes jo të mirë të vagonëve, numri i udhëtarëve mbetet i vogël. Qytetarët e kujtojnë me nostalgji kohën kur me tren nga Kosova janë nisur për në vendet tjera.

Situatë më e mirë nuk është as te bartja e mallrave, që sipas të dhënave të fundit, ka rënie të madhe.

Kosova ka 333 km binarë hekurudhor, në të cilat deri tani funksionojnë tri linja, Fushë Kosovë-Han i Elezit, Han i Elezit-Shkup dhe Fushë Kosovë-Pejë. Linja Fushë Kosovë-Leposaviq nuk është nën kontrollin e autoriteteve kosovare që nga paslufta.