Profesori i Universitetit të Prishtinës, Xhevat Krasniqi, është deklaruar i pafajshëm në akuzën për ngacmim seksual.
Krasniqi ishte denoncuar nga 27 studente për ngacmim seksual. Një vit pas nisjes së hetimeve, Prokuroria Themelore ngriti aktakuzën.
Në mars të 2024-tës, KOHA ka raportuar për ankesën e studenteve të Fakultetit të Mjekësisë dhe për zvarritjen e rastit në Këshillin e Etikës, ku profesori është denoncuar.
Në denoncimin e tyre, studentet patën thënë se gjatë vitit 2023 profesori Krasniqi u është drejtuar me sjellje joprofesionale dhe me komente për pamjet e tyre fizike.
Dy muaj pas denoncimit, Krasniqi qe pezulluar nga pozita e profesorit në Universitetin e Prishtinës (UP).
Këtë vendim e pati marrë Rektorati i UP-së, pas rekomandimit të Këshillit të Etikës, që Krasniqi të pezullohet nga puna deri në përfundimin e hetimeve nga ana e Prokurorisë.
Në vendimin e Këshillit janë paraqitur versionet e të dyja palëve, studenteve parashtruese të ankesës, si dhe të profesorit.
Në deklaratë, Krasniqi ka thënë se fjalët e paraqitura nga studentët janë shtrembëruar.
Kundër profesorit Krasniqi, dhjetëra studentë kanë protestuar, me kërkesën që ai të përjashtohej nga UP-ja, por Rektorati ka shpërfillur kërkesat.
