Kosova shfrytëzon për ngrohje gjysmë milioni metër kub dru më shumë se rritja vjetore e tyre

Organizata joqeveritare WWF Adria ka shprehur shqetësimin se mbrojtja e pyjeve të Kosovës ende mbetet në nivel jo të duhur.

Në Ditën Ndërkombëtare të Pyjeve, kjo organizatë përmend statistika sipas së cilave rritja vjetore e pyjeve në Kosovë është rreth 1,5 milion metër kub ndërkohë që shfrytëzimi i drurëve për ngrohje arrin në rreth 2 milion metër kub. Në anën tjetër prerja e lejuar e drurëve është rreth 1,4 milion metër kub.

“Kjo na paraqet një tejshfrytëzim të pyjeve nga mundësia e rritjes vjetore. Prerjet e kontrolluara dhe planifikuara nga institucionet përgjegjëse janë në nivel shumë të ulët krahasuar me kërkesat vjetore të popullatës. Mbi 80% e masës drusore konsiderohet se prehet në mënyrë jo të rregullt", ka thënë Krenare Salihu nga WWF Adria.

Sipërfaqja pyjore në Kosovë është rreth 481.000 ha ose 44.7% e sipërfaqes totale. Sipas ligjit për pyjet, Pyjet e Kosovës janë resurse kombëtare, do të udhëhiqen në atë mënyrë që të ofrojnë rendimente me vlerë dhe në të njejtën kohë të ruhet biodiversiteti për të mirën e gjeneratave të tashme dhe të ardhshme.