Kosova rrezikon të humbë 584 mln euro, 7 kompani e kanë çuar në Arbitrazh

Kosova do të përballet në Arbitrazhin Ndërkombëtar me pretendimet e 7 kompanive pas të cilave qëndrojnë biznesmenë të huaj ose edhe kosovarë me shtetësi të ndonjë shteti tjetër.

Pretendimet e tyre janë që Kosovës t’ia marrin diku çerekun e buxhetit vjetor. Saktësisht 584 milionë euro është vlera e kompensimit që në total ato kërkojnë.

Për nga lartësia e kompensimit në krye të listës qëndrojnë dy kompani guroresh: “Rex Marble”, që kërkon 250 milionë euro, ndërsa “Fox Marble” 195 milionë euro.

“Rex Marble”, që kërkon shumën më të lartë, është biznesi i fundit që i është drejtuar Arbitrazhit nën justifikimin se iu tjetërsuan aksionet e tri guroreve të granitit dhe mermerit e edhe se licencat u bartën tek një person tjetër.

Në Ministrinë e Drejtësisë janë treguar të përmbajtur në lidhje me pritjen nga ky kontest.

Edhe Arbëri 15 dhj 2021 “REX Marble” kërkon nga Kosova 250 milionë euro shkaku i tjetërsimit të aksioneve

“Avokatura Shtetërore rastin në fjalë do ta trajtojë në përputhje me përgjegjësitë dhe kompetencat që ka, ndërsa vendimi do të jetë i Tribunalit të Arbitrazhit, e për të cilin nuk mund të predikojmë”, thuhet në përgjigjen e Ministrisë së Drejtësisë.

Kosovën e ka vënë në Arbitrazh edhe ish-deputeti i PDK-së, Bedri Selmani. Në emër të investimeve, në hotelin “Victory”, “AutoPrishtina” dhe pompat e karburanteve “Kosova Petrol”, ai kërkon 65 milionë euro.

Janë 35 milionë euro të tjera që institucioni mikrofinanciar “Iute Credit” synon t’ia marrë Kosovës pas licencës që ia hoqi BQK-ja shkaku i shumëfishimit të lartësisë së normave të interesit.

Kompania tjetër pretenduese është “ContourGlobal”, e cila pasi u tërhoq nga ndërtimi i termocentralit “Kosova e Re” kërkoi nga Kosova 20 milionë euro për mosrespektim të kontratës.

Edhe Arbëri 28 kor 2021 Dyshime për sajim mosmarrëveshjeje me qëllim përfitimi të 195 milionëve të shtetit

E pas 30 milionë eurove që i mori në Arbitrazh, “Dardafon” e biznesmenit Shkëlqim Devolli kërkon edhe 13 milionë euro të tjera, pasi Telekomi nuk ia vazhdoi një kontratë që e kishte me të.

Miliona shtetit synon t’i marrë edhe deputeti më i pasur i Kosovës, Behgjet Pacolli, i cili për një kohë ka qenë edhe zëvendëskryeministër. Kompania “Mabco Constructions” pas të cilës ai qëndron, kërkon 6 milionë euro për çështjen që lidhet me anulimin e privatizimit të “Hotelit Grand”.

Autoritetet e Kosovës kanë lidhur kontrata milionëshe me kompani ndërkombëtare të avokaturës, me qëllimin për ta mbrojtur shtetin në një numër prej këtyre rasteve që ndodhen në Arbitrazh.