Kontigjent i ri të rinjsh gati për tregun e punës

Edhe rreth 400 të rinj të certifikuar për ndërmarrësi dhe zhvillim të planeve të biznesit i janë shtuar Kosovës. Sot, Ministria e Kulturës, Rinisë dhe Sportit ka organizuar ceremoninë e shpërndarjes së certifikatave “Trajnime për ndërmarrësi dhe zhvillim të planeve të biznesit”.

Në ceremoni mori pjesë edhe ministri i Kulturës, Rinisë dhe Sportit, Kujtim Gashi, i cili e ka vlerësuar të suksesshëm këtë projekt të edukimit të të rinjve, të cilin e ka mbështetur MKRS-ja. Ai, me ketë rast tha se MKRS-ja vazhdon të ketë përkushtim dhe përkrahjen për fuqizimin e rinisë në Kosovës, duke u vënë bashkërisht në shërbim të komunitetit rinor dhe në funksion të implementimit të Ligjit për fuqizimin dhe pjesëmarrjen e rinisë si dhe Planin e veprimit për rritjen e punësimit te të rinjve.

“Në këtë tremujor të fundit kemi arritur të mbështesim 5 organizata joqeveritare/kompani në 7 regjione të Kosovës. Përmes këtij projekti ne synojmë t’i përgatisim të rinjtë për tregun e punës përmes trajnimeve në ndërmarrësi që do të ndihmojnë të rinjtë të zhvillojnë njohurit në hartimin e planeve të biznesit”, tha ministri Gashi.

Ai tha se përmes këtyre trajnimeve/moduleve u është dhënë mundësia e përgatitjes për biznes plane të gjithë rinjve nga të gjitha komunitetet që jetojnë në vendin tonë.