KDI: Qytetarët janë skeptikë ndaj dialogut me Serbinë

6 vjet pas nisjes së procesit të dialogut me Serbinë, qytetarët e Kosovës vazhdojnë të jenë skeptikë për të, raporton KTV.

Në një hulumtim të Institutit Demokratik të Kosovës, në të gjitha katër pyetjet qytetarët janë përgjigjur negativisht për të arriturat e marrëveshjeve.

Kosovarët në përgjithësi, janë të pakënaqur me shtrirjen e sovranitetit të shtetit në veri, ku 51.1 për qind e qytetarëve janë të mendimit se dialogu Kosovë-Serbi nuk ka ndikuar që institucionet të shtrijnë sovranitetin edhe në atë pjesë me shumicë serbe. Kjo, në fakt ka qenë një nga sukseset me të cilat janë mburrur udhëheqësit e bisedimeve, se kanë shtrirë sovranitetin në veri. 58 për qind mendojnë se integrimi i gjykatave në sistemin gjyqësor të Kosovës nuk do të jetë i suksesshëm. 48.2 për qind thonë se dialogu nuk ka ndikuar të shuhen strukturat paralele dhe 46.1 për qind e të anketuarve mendojnë se Asociacioni i Komunave me shumicë serbe do të përkeqësojë raportet ndëretnike.

Gjatë prezantimit të këtij hulumtimi, Jeta Kasniqi nga KDI-ja ka thënë se rekomandimi kryesor i raportit për institucionet është që të jenë më transparente dhe gjithashtu është bërë thirrje të rishikohet formati i këtyre bisedimeve.

Ky është hulumtimi i tretë i opinionit i kryer nga KDI-ja rreth procesit të bisedimeve.