Katër zhvillimet pozitive politike në parafushatë, sipas Surroit

Publicisti Veton Surroi ka thënë se ka parë katër lajme të mira në kuadër të zhvillimeve politike në parafushatën për zgjedhjet e 6 tetorit.

Surroi ka përfshirë në këto lajme të mira katër subjektet apo koalicionet më të mëdha në vend.

Sipas tij, lajm i mirë është që Albin Kurti si kryeministër nuk tingëllon më parullë politike, por si mundësi reale. Ai ka thënë se ka parë evoluim të pozicionit të Kurtit dhe VV-së me ofertën që i kanë bërë LDK-së për koalicion parazgjedhor

“Lajm i mirë është padyshim se nga margjinat e zhvillimeve në 20 vjetët e fundit, Albin Kurti si kryeministër nuk tingëllon më parullë politike, por si mundësi reale. Ka pas një evoluim të pozicionit të Kurtit e VV-së, para se të përfundojë afati i koalicioneve parazgjedhore. Ishte një ofertë e Kurtit që demonstronte një pjekuri të tij personale dhe lëvizjes që e drejton, e që i jepte përparësi zonjës Osmani t’i printe listës, por ta kenë listën e përbashkët. Është lajm i mirë sepse kemi një parti e cila është identifikuar si qendër e majtë evropiane, kemi një avancim të këtij poli”, ka deklaruar ai në Rubikon të KTV-së.

Surroi ka thënë se pozitiv është edhe avancimi i Vjosa Osmanit brenda LDK-së, që u kandidua për kryeministre. Ai ka thënë se LDK-ja, nga një parti që s’i ka kushtuar vëmendje pozitës së gruas, tash ka kaluar në parti që nominon një grua për kryeministre.

“Lajmi i dytë është avancimi i zonjës Osmani, kandidimi i saj për kryeministre nga LDK-ja, nëse fiton LDK-ja. Është situata ku zonja Osmani e cila ka qenë në margjinat e LDK-së, në margjinat në kuptimin e pozicionit politik karshi PDK-së, tash po kalon në një qendër, po identifikohet pozicioni i saj si i rëndësishëm. Një parti tradicionale si LDK-ja e cila nuk i ka kushtuar vëmendje pozitës së gruas e nominon një kryeministre në saje të meritave të veta. S’është person që del nga zarfi, por di të flasë, të punojë e është dëshmuar si e tillë dhe bën pjesë në gjeneratën e re thënë kushtimisht të LDK-së. Kemi lëvizje pozitive në LDK, në një frymë konsensuale që është plus i madh për partinë”, ka thënë Surroi.

Sipas Surroit, zhvillim pozitiv është edhe që AAK-ja s’ka bërë koalicione të mesnatës. Ai ka thënë se bashkëpunimi i hershëm me PSD-në paraqet zhvillim pozitiv.

“Zhvillimi i tretë pozitiv që e pash unë është që Aleanca për Ardhmërinë e Kosovës s’bëri koalicione të mesnatës, por hyri në bashkëbisedim me PSD-në dhe nënshkruan koalicion shumë ditë para afatit. S’ishte i detyruar nga lufta për ekzistencë, por projekt i dëshmuar më mirë që dëshmon racionalitet”, ka vlerësuar ai.

Treguesin e katërt pozitiv, Surroi e ka parë te PDK-ja dhe pozicionimin e kësaj partie në luftën kundër korrupsionit e nepotizmit.

“Një tregues i katërt pozitiv është që PDK-ja që njihet si bosht i lidhur me korrupsion, krim dhe nepotizëm, del të ketë formulën kryesore, pozicionin e vet kryesor politik me zotin Veseli, luftën kundër korrupsionit dhe nepotizmit”, ka thënë Surroi.