Haxhiu: Do t’i shtojmë kapacitetet në organet e drejtësisë për gjykimin e kriminelëve të luftës

Ministrja e Drejtësisë, Albulena Haxhiu, gjatë vizitës së sotme te Shoqata “Thirrjet e Nënave” në Gjakovë, është zotuar se do të luftojnë për zbardhjen e fatit të personave të pagjetur.

Ajo gjithashtu ka premtuar se kriminelët e luftës do të vendosen para drejtësisë dhe do të marrin dënimin e merituar.

Ajo gjatë takimit me Nysrete Kumnovën nga shoqata “Thirrjet e Nënave”, tha se prioritet i Qeverisë Kurti është zbardhja e rreth 1600 të pagjeturve, pasi që negociatat e kaluara me Serbinë nuk e kanë trajtuar asnjëherë këtë temë të rëndësishme.

“Ne nuk duhet të harrojmë asnjëherë se çka Serbia ka bërë në Kosovë dhe do të punojmë pandërprerë të fuqizojmë institucionet tona që të merren me hetimin dhe gjykimin e krimeve. Kriminelët duhet të përballen me drejtësinë. Mua më erdhi mirë që për herë të parë javën e kaluar prokuroria ka ngritur aktakuzë për krime kundër njerëzimit dhe dhunim seksual. Janë 20 mijë persona që kanë qenë të dhunuar gjatë luftës së fundit në Kosovë. Do të shtojmë kapacitetet në organet e drejtësisë dhe do të zbatojmë nenin për gjykim në mungesë, sepse Serbia nuk i dorëzon kriminelët e luftës, por tashmë institucionet e drejtësisë i kanë duart e lira për t’i gjykuar kriminelët dhe kudo që ata të gjenden do të vijnë dhe të vuajnë dënimin”, është shprehur Haxhiu.

Ajo ka bërë të ditur se projektligji për personat e pagjetur ndodhet në Ministrinë e Drejtësisë dhe shumë shpejt do të mblidhen grupet punuese, ku do të përfshihet edhe shoqata ‘Thirrjet e Nënave’ për të adresuar shqetësimet dhe kërkesat.

Edhe Arbëri 19 qer 2025 Shënohet Dita e të mbijetuarve të dhunës seksuale gjatë luftës, respektohet memoria kolektive

Ndërsa, Nysrete Kumnova, shprehu shpresën për përmirësimin e ligjit për persona të pagjetur gjatë luftës në Kosovë.

“Ju si Qeveri ta keni prioritet këtë kategori shumë të ndjeshme. Kanë kaluar 21 vjet, por për ne është shumë e gjatë dhe e dhimbshme. Jeta dhe ankthi për këto nëna dhe gra të reja është shumë e vështirë. Lulet tona na i morën kriminelët, kështu që së paku po e gjejmë qetësinë me institucionet tona, të cilave iu bie ndërmend dhe nuk na harrojnë në këtë ditë të shenjtë. Të paktën të gjejmë një qetësi”, tha Kumnova./ksp/