Haradinaj thotë se njëri nga dy të rinjtë shqiptarë që u rrahën në Novi Sad “po lufton për jetë”

Kryeministri i vendit, rrahjen brutale të dy të rinjve shqiptarë në Novi Sad e ka cilësuar si “të pashembullt”.

Ramush Haradinaj, në një postim në Facebook, thotë se “sulmi mbi dy udhëtarë shqiptarë dëshmon se lëvizja e lirë në shtetin serb nuk është e garantuar dhe çdo akt dhune është larg vlerave evropiane”.

“Derisa Çlirim Maloku po lufton për jetë, nga lëndimet e marra, një shtet që negocion për anëtarësim në BE duhet të ndërmerr veprime të shpejta për ta zbardhur rastin”, ka shkruar Haradinaj, raporton Koha.net.

Dy të rinjve shqiptarë, kreu i ekzekutivit kosovar u ka uruar shërim sa më të shpejtë, ndërsa kërkoi që sulmuesit të sillen para drejtësisë dhe të marrin ndëshkimin meritor.