Gjobitet QKMF-ja në Vushtrri për mospërputhje në raportimin e 200 vaksinave

QKMF-ja në Vushtrri dhe drejtoresha e saj janë gjobitur nga Inspektorati Shëndetësor për raportim të pasaktë të 200 dozave të vaksinës kundër gripit. Inspektorati thekson mungesë transparence. Në QKMF-në e Vushtrrisë deklaruan se asnjë vaksinë nuk është keqpërdorur, por për shkak të problemeve teknike, ato nuk janë raportuar në sistemin e Ministrisë

Inspektorati Shëndetësor ka shqiptuar gjobë ndaj Qendrës Kryesore të Mjekësisë Familjare në Vushtrri dhe drejtoreshës së këtij institucioni për mosraportim të saktë të stokut të vaksinave kundër gripit sezonal.

Sipas vendimit që e posedon KOHA, QKMF-ja nuk ka raportuar saktë për 200 doza të vaksinës, për çka është gjobitur me 5 mijë euro, ndërsa drejtoresha Naile Xhaka me 500 euro.

Inspektorati në vendim thekson se gjatë inspektimeve në terren nuk iu ofrua qasje dhe as dëshmi për verifikimin e saktë të stokut.

“Gjatë inspektimeve të datës 09.06.2025 nuk patëm qasje në Sistemin e Menaxhimit të Stokut Farmaceutik, për arsye se përgjegjësja e vaksinimit nuk ishte prezente, duke pamundësuar verifikim të menjëhershëm nga ana e Inspektoratit Shëndetësor. Sipas deklaratës së dr.Naile Xhaka, dërguar përmes email-it zyrtar me 07.07.2025, ku deklaron se ky institucion është furnizuar me 2500 doza të vaksinës dhe në SMSF janë raportuar 2333 doza të vaksinës, kurse numri i vaksinave të administruara gjithsej janë 2333 doza, në stok janë 135 vaksina, 32 doza janë dëmtuar. Gjatë inspektimit të datës 07.07.2025, nga ana e stafit përgjegjës nuk u ofruan dëshmi në kohë reale për verifikimin e raportimit të saktë të vaksinave të gripit në SMSF”, thuhet në arsyetimin e vendimit. 

Sipas Inspektoratit, raportimi i drejtoreshës së QKMF-së për numrin e vaksinave në stok bie ndesh me raportin e Institutit Kombëtar të Shëndetit Publik, i cili ka gjetur një mospërputhje prej 200 dozash të paraportuara.

“IKSHPK-ja, përmes emailit zyrtar të datës 08.07.2025 e ka përcjellë raportimin e vaksinës kundër gripit për QKMF-Vushtrri, institucion ky i cili ka raportuar në Sistemin për Menaxhimin e Stokut Farmaceutik me 2133 vaksina të gripit. Nga krahasimi i këtyre të dhënave rezulton mospërputhje prej 200 dozash të vaksinave të gripit të cilat nuk figurojnë të raportuara, duke bërë shkelje të dispozitave ligjore në fuqi”. 

Në QKMF-në e Vushtrrisë kanë deklaruar se asnjë vaksinë nuk është keqpërdorur, por për shkak të problemeve teknike ato nuk janë raportuar në sistemin e Ministrisë.

“Sistemi i informimit nuk ka punuar si duhet edhe ato kanë shkuar deri diku edhe po i gjejnë tash që janë aty, po nuk kanë shkuar të raportuara në Ministri. Edhe kanë mbetur pa u raportuar. Të gjitha dozat janë të numëruara në protokolle, janë të sakta, asnjë nuk mungon. Nuk kanë pasur qasje, nuk ka punuar sistemi edhe atë ditë. Kanë qenë edhe punëtorët prej qendrave të tjera, pak të papërgatitur, prej fshatrave që nuk punojnë me sistem dhe atë ditë nuk ka qenë sistemi në funksion. Asnjë nuk është keqpërdorur edhe stoku ka edhe disa doza”, ka thënë Naile Xhaka, drejtoreshë e QKMF-së në Vushtrri. 

Edhe drejtori i Shëndetësisë në Komunën e Vushtrrisë, Lorik Maxhuni, deklaroi se mospërputhja ka të bëjë me raportim teknik.

“Asnjë vaksinë nuk ka humbur. Vaksinat janë administruar sipas rregullave, ndërsa një pjesë ka mbetur në stok. Mospërputhja e evidentuar nga inspektimi lidhet vetëm me faktin që një pjesë e vaksinimeve nuk janë regjistruar në kohë në sistemin elektronik, për shkak të problemeve teknike që ekzistojnë prej kohësh dhe për këtë është përgjegjëse Ministria e Shëndetësisë. Pra, është një çështje e raportimit teknik dhe jo një skandal apo keqpërdorim”, ka theksuar Maxhuni. 

KOHA e ka kontaktuar Ministrinë e Shëndetësisë lidhur me pretendimet e zyrtarëve në Vushtrri për problemet teknike në sistemin e Ministrisë, por gjatë ditës nuk ka pranuar përgjigje.