Gjendja jo e mirë e parkut te varrezat e dëshmorëve në Velani të Prishtinës, ka nxjerrë në protestë fëmijë dhe prindër nga lagjet përreth. Ata kërkuan që të ndalet degradimi i mëtejmë i parkut.
Fëmijët kanë kërkuar që parku të kthehet në shfrytëzim përmes ndërtimit të fushave sportive dhe krijimin e hapësirave gjelbëruese, raporton KTV.
Përfaqësuesi i fëmijëve, Leon Biçaku, tha se në vend që t’i kushtojnë kohë shkollimit të tyre, ata tani duhet të trajtojnë probleme që janë përgjegjësi e institucioneve.
Protestuesit kërkuan që varrezat të zhvendosen, pasi vlerësuan se dëshmorët meritojnë të pushojnë në një vend më të përshtatshëm.
Derisa në vend të varrezave, propozuan ngritjen e një memoriali ku do të shkruheshin emrat e të gjithë dëshmorëve.
Liridon Llapashtica, një nga organizatorët e protestës, kërkoi që parku të kthehet në gjendje të rregullt.
Edhe
Kërkohet mosdegradimi i parkut te varrezat e dëshmorëve
Qytetarët janë deklaruar të shqetësuar për gjendjen e parkut dhe rrezikshmërinë që ai paraqet.
Në fund të protestës, fëmijët kanë mbjellë një fidan, si simbolikë kundër shkatërrimit të gjelbërimit. Projekti për rregullimin e parkut i cili rrethohet prej së paku 4 lagjeve, ka nisur para rreth 8 vjetësh.
