BE-ja e shqetësuar me shpronësimet në veri, thirrje Qeverisë

Bashkimi Evropian u ka bërë thirrje autoriteteve të Kosovës që t’i përmbahen “rreptësisht” procedurave ligjore në shpronësimin e pronës, që të sigurojnë proces të rregull dhe të respektohen të drejtat pronësore të atyre që preken nga vendimi për shpronësim.

Reagimi i BE-së ka ardhur pas vendimit të Qeverisë për shpronësimin e disa tokave në komunën e Leposaviqit dhe atë të Zubin-Potokut.

BE-ja ka udhëzuar Qeverinë, përmes një deklarate, duke theksuar se për shkak që vendimi për shpronësim është i ndjeshëm nga natyra, “procedurat ligjore parashikojnë hapa të tillë si njoftimi paraprak dhe informacioni gjithëpërfshirës i pronarëve të pronave, e drejta e tyre për të paraqitur komente për shpronësimin e kërkuar, mundësia e një mjeti të përshtatshëm juridik, dhe kompensimi adekuat i tyre përpara se procesi të përfundojë”.

Për më tej, BE-ja e sheh me shqetësim vendosjen e policëve në tokat për të cilat u vendos që të shpronësohen.

“Vendosja e katër bazave të Policisë së Kosovës në tokë private dhe shoqërore - në disa raste para fillimit të procedurave të shpronësimit - ngre shqetësime për të drejtat pronësore në veri të Kosovës dhe duhet të adresohet në mënyrë adekuate nga autoritetet”, thuhet në deklaratë.

Më 10 maj, Qeveria e Kosovës ka miratuar vendimin për shpronësimin e tokave në komunat me shumicë serbe në veri të Kosovës, Leposaviq dhe Zubin Potok.