Ish-këshilltari i ish-kryeministrit Isa Mustafa, e njëherësh edhe ish=ministër në Ministrinë e Administrimit të Pushtetit Lokal, ka shkruar për atë që e ka quajtur “të arritura ‘madhore’ të ish-opozitës ‘së bashkuar’”.
Ky është artikulli i plotë i Gecajt:
• Ju bashkuan PDK-së e Listës Serbe për të rrëzuar qeverinë më të mirë të cilën ky vend e kishte pasur ndonjëherë - u bë pra bashkë “shapi e sheqeri” kundër rrezikut më të madh të tyre të përbashkët, LDK-së;
• Ringjallën pothuajse nga hiri feniksin e fantazmës së PDK-së, dhe ushqyen edhe më tutje apetitet grabitqare të kësaj partie emblematike të pabesisë;
• Mundësuan instalimin e qeverisë së “komandantëve”, më të keqen që ky vend ka pasur dhe që mund ta ketë ndonjëherë;
• Realizuan ëndrrën dhe fiksimin patologjik të Ramushit për tu bërë kryeministër;
• LVV u nda në dy taborre, me një konfrontim të ashpër dhe me premisa të mungesës së plotë të moralit njerëzor e grupor;
• Demarkacioni kaloi plotësisht në formën e tij fillestare;
• Qeveria e re premton implementimin e asociacionit gjithashtu;
• Mbajtën qytetarët e pafajshëm të mbyllur për tri vite shtesë;
• Shkatërruan edhe atë pak imazh që i kishte mbetur vendit tonë;
• Lënduan seriozisht institucionalizmin dhe demokracinë e re kosovare;
• Bllokuan, parandaluan e dëmtuan edhe shumë procese tjera të rëndësisë nacionale.
Një LDK e fortë e paraluftës nxori pamëdyshje vendin nga pushtimi shekullor ... një LDK e fortë e pasluftës dërgoi paluhatshëm vendin drejt statusit të pavarësisë ... dhe edhe tani, vetëm një LDK e fortë padyshim se do ta drejtojë vendin kah integrimi i sigurt e i përshpejtuar në strukturat veri-atlantike. Prandaj, të mbesim me shpresë se përfundimisht do të vetëdijesohemi si popull për hir të fatit të vendit dhe ardhmërisë sonë të sigurt!