Aliu: Buxhetit i 2024-s pa ndryshim nga vitet e kaluara

Ekonomisti Florin Aliu ka vlerësuar se projektbuxheti për vitin 2024, që u miratua në parim të enjten nga Kuvendi, nuk ka ndonjë ndryshim të madh nga vitet e kaluara.

Aliu ka thënë se Kosova si shtet në tranzicion ka ende nevojë për investime kapitale, e në projektbuxhet shumica e investimeve kapitale janë të bartura nga viti i kaluar.

“Struktura buxhetore është thuajse aty-aty, siç ka qenë në vitet e kaluara. S’shoh ndonjë ndryshim të madh. E kemi këtë qeveri qe tre vjet. Ne jemi ende në situatën ku kemi nevojë për investime kapitale. Nuk e di ndonjë investim kapital serioz nga kjo qeveri”, ka thënë Aliu në “Interaktiv”, duke kritikuar ekzekutivin për mostransparencë sa i përket çështjeve ekonomike.

Duke komentuar deklaratën e kryeministrit Albin Kurti se reformat ekonomike gjatë qeverisjes së tij kanë pasur sukses, Aliu ka thënë se rritja ekonomike e dëshmon të kundërtën.

“Na e kemi një indikator që na tregon nëse reformat kanë pasur sukses. Është rritja ekonomike. Rritja ekonomike ka rënë në 3 për qind. Pas pandemisë, kryeministri tha se jemi vendi me rritjen më të madhe ekonomike, por ne u kthyem në 3 për qind, ashtu siç kanë parashikuar institucionet botërore financiare. Sepse gjeneratorët e rritjes ekonomike nuk janë të aktivizuar. Zhvillimi i qëndrueshëm nënkupton rritje page, standard më të mirë të jetesës. Viti 2014 ka qenë kur ka pasur rritje signifikante të pagave. Indikatorët e parë të zhvillimit janë paga, rritja ekonomike dhe inflacioni”, ka thënë ai.

Aliu ka thënë se Kurti e ka marrë pushtetin në një periudhë ku s’ka pasur stabilitet ekonomik, por që nga atëherë, sipas ekonomistit, ekzekutivi s’ka bërë ndonjë reformë ekonomike.