-
Nga:
Valbona Bytyqi
- 4 shtator 2020 16:27
- Shpërndaje në:
Aleanca për Ardhmërinë e Kosovës nuk është duke u pajtuar me një pikë të marrëveshjes për të cilën janë dakorduar delegacioni i Kosovës me Serbinë në Washington.
Në një përgjigje për KOHËN, deputeti i kësaj partie, Gazmend Syla, duke mos dhënë detaje ka thënë shkurt se AAK-ja “s’do të lejojë që asnjë pjesë e territorit të Kosovës të menaxhohet nga dikush tjetër”.
“Ne nuk i bëjmë presion askujt. Ne vetëm qëndrojmë në mbrojtje të kushtetutshmërisë së Kosovës së 17 shkurtit”, ka thënë ai.
Kosova dhe Serbia të enjten zhvilluan takime për disa orë në Shtëpinë e Bardhë, me diskutimet që në qendër kishin çështjet ekonomike. Kryeministri i Kosovës, Avdullah Hoti, kishte thënë pas takimit se kjo marrëveshje është hap përpara në arritjen e marrëveshjes finale.
Marrëveshja pritet të nënshkruhet të premten rreth orës 17:00, sipas kohës sonë lokale. Në ceremoninë e nënshkrimit do të jetë i pranishëm edhe presidenti amerikan Donald Trump.
Pas takimeve të së enjtes, presidenti serb Aleksandar Vuçiq, ka thënë se në tavolinë i ishte dorëzuar edhe një letër me të cilën i kërkohej njohja e Kosovës, por kishte shtuar se kjo u refuzua kategorikisht.
AAK-ja, me në krye Ramush Haradinajn, kohëve të fundit ka shfaqur shenja mosbesimi në kryeministrin Avdullah Hoti për çështjen e dialogut. Vetë Haradinaj ka përsëritur disa herë se në dialog duhet të ketë edhe përfaqësues të partisë së tij. Të enjten Kosova në takimet kryesore në Washington u përfaqësua nga kryeministri Hoti, koordinatori shtetëror Skënder Hyseni, zëvendëskryeministrja Albulena Balaj-Halimaj e ministri i Drejtësisë Selim Selimi, që vjen nga AAK-ja.
