9 për qind e kosovarëve mbi 65 vjeç

Dita Ndërkombëtare e të Moshuarve në Kosovë është shënuar me një diskutim për gjendjen e tyre dhe mbi mundësitë për adresimin e nevojave që ata kanë. Sipas të dhënave të Fondit të Kombeve të Bashkuara për Popullsinë, numri i të moshuarve në botë do të dyfishohet brenda 30 vjetësh. E, aktualisht numri i personave mbi 65 vjeç përbën 9 për qind të banorëve të Kosovës

Kimete Zeqa e Isa Podvorica ishin të ftuar nderi të premten në tryezën e organizuar nga Fondi i Kombeve të Bashkuara për Popullsinë (UNFPA), me rastin e shënimit të Ditës Ndërkombëtare të Personave të Moshuar.

Zeqa, infermiere në pension, e Podvorica, saldator në pension, ndanë rrëfimet e tyre lidhur me të qenit i moshuar në Kosovë.

“Unë në fjalor nuk e kam plakë, në fjalor nuk e quaj vetëm plakë. Pse? Sot kur u nisa me ardhë thashë: O zot sa vjet i kam? Do të thotë 74 po i bëj, por nuk e quaj veten plakë”, ka thënë Zeqa. “Arsyeja pse nuk e quaj veten plakë: Unë për vete kam punuar 45 vjet në Shtëpinë e Shëndetit dhe prej 2002 kam menduar kur të pensionohem çfarë do të bëj. Prej atëherë kam filluar me aktivitete, por nuk e ndiej veten asnjëherë të moshuar”.

Edhe Podvorica foli në këtë frymë.

“Jeta ime, si ka kaluar në moshën time, ka qenë e mirë, edhe me familje, edhe me fshat dhe me popullatën shqiptare”, ka thënë ai. “Sa i përket lirisë sonë, e kemi lirinë, por jo, nuk e kemi definitive të plotë, e kemi pasur qejf me e bë si në të gjitha shtetet, të barabarta”.

Edhe Arbëri 19 sht 2026 Ekspertët kërkojnë përgatitje të shtetit përballë plakjes së popullsisë

Udhëheqësja e Zyrës së UNFPA-së në Kosovë, Visare-Mujko-Nimani, tha se në 30 vjetët e ardhshëm numri i personave të moshuar në botë pritet të dyfishohet.

Ajo e ka vlerësuar lart kontributin e të moshuarve, me theks të veçantë të grave.

“Kontributet që kanë dhënë dhe po japin gratë e moshuara në jetën politike, civile, ekonomike, sociale dhe kulturore mbesin kryesisht të padukshme dhe të pavlerësuara. Ky grup shoqëror priret që të jetë subjekt i diskriminimit të shtuar, që rezulton nga kryqëzimi i diskriminimit në baza moshe dhe gjinore”, ka thënë Mujko-Nimani.

Deputetja Fatmire Kollçaku, që është kryetare e Komisionit parlamentar për Shëndetësi dhe ishte e pranishme në këtë konferencë, ka thënë se duhet të bëhet më shumë për të moshuarit.

Edhe Arbëri 20 dhj 2024 11 për qind e popullsisë në Kosovë, mbi 65-vjeçare

“Edhe si shtet jemi të njohur që kryesisht kemi popullatë të re, por fatmirësisht me jetëgjatësinë e njerëzve shtohet edhe numri i personave të moshuar, gjë që nënkupton se edhe obligimet e shoqërisë duhet të rriten karshi moshës së tretë, sepse pleqëria po vike shumë shpejt”, ka thënë ajo.

Sipas të dhënave të Fondit të Kombeve të Bashkuara për Popullsinë, aktualisht numri i personave mbi 65 vjeç përbën 9 për qind të banorëve të Kosovës.