Kryetari i Preshevës i dërgon letër Kurtit, i bën thirrje ta vazhdojë dialogun
Kryetari i Preshevës, Shqiprim Arifi, i ka bërë thirrje kryeministrit të Kosovës, Albin Kurti, që ta vazhdojë dialogun me Serbinë dhe komunikimin diplomatik.
Arifi në një letër drejtuar Kurtit ka thënë se “nëse ndërpritet dialogu dhe komunikimi diplomatik, atëherë shqiptarët e Preshevës janë në shënjestër të një situate apo grupi terrorist”.
“Shqiptarët e Luginës kanë qenë të dënuar, të pambrojtur dhe të diskriminuar për 30 vjet dhe në 10 vitet e fundit edhe të pasivizuar nga adresat e tyre. Prandaj, është e rëndësishme që ju, të konsideroni kërkesën e partnerëve ndërkombëtarë të cilët ftojnë në dialog dhe komunikim në vazhdimësi, për arsye se jo vetëm ju jeni të rrezikuar në veri të Kosovës dhe në Kosovë në përgjithësi, por nëse dialogu dhe komunikimi diplomatik ndërpritet, shqiptarët në Luginë të Preshevës janë në shënjestër të një situate apo grupi terrorist. Është jetike për ne të aktivizoni të gjitha kanalet e komunikimit diplomatik, për të garantuar siguri për shqiptarët në Luginë. Përndryshe, Lugina e Preshevës së bashku me veriun mund të bëhen ‘fuçi baruti’”, ka shkruar Arifi.
Arifi ka thënë se çdo sulm ndaj shtetit të Kosovës prek gjithë banorët e Luginës së Preshevës, porse në këto ditë ka nevojë që Kosova të jetë me Luginën.
“Lugina e Preshevës është Kosovës, çdo sulm ndaj shtetit të Kosovës në mënyrë të drejtpërdrejtë prek banorët e Luginës së Preshevës. Në çdo betejë ne kemi qenë krah Kosovës, por sot kemi nevojë që Kosova të jetë me ne! Në ditët si këto, bashkërendimi me miqtë tanë ndërkombëtarë SHBA dhe BE, është e vetmja zgjidhje për Kosovën si dhe për Luginën e Preshevës”, ka shkruar Arifi.
