Rama sërish bën thirrje që KFOR-i ta kontrollojë veriun: Kosova është pikë e nxehtë
Kryeministri i Shqipërisë, Edi Rama, ka përsëritur qëndrimin e tij se KFOR-i duhet të rivendosë kontrollin në veri të Kosovës ose do të përballet me dhunë të vazhdueshme midis serbëve etnikë dhe shqiptarëve.
Në një intervistë dhënë “Financial Times”, ka thënë se me kalimin e kohës “Kosova është bërë tokë e askujt”.
“Kosova është një pikë e nxehtë. Me kalimin e viteve është bërë një tokë e askujt ku të gjitha llojet e krimeve kombinohen me nacionalizmin në rritje. Kufiri mes krimit dhe politikës është zbehur”, ka thënë ai.
Rama ka thënë se duhet të mbahet një konferencë e nivelit të lartë që përfshin liderët e Francës dhe Gjermanisë dhe riangazhimin e SHBA-së.
"Kjo është mënyra më e mirë për të dalë nga kjo çmenduri e pafund”, ka shtuar Rama.
Sipas tij, qëllimi është njohja e plotë e Kosovës në BE dhe në Kombet e Bashkuara.
“Nuk është e lehtë të ndryshosh rrjedhën e historisë, kjo kërkon lidership. Por nëse Franca dhe Gjermania mund ta bëjnë atë [pas Luftës së Dytë Botërore], nëse Arabia Saudite dhe Izraeli mund ta bëjnë atë, atëherë e dimë se mund të ndodhë”, është shprehur Rama.
