Qeveria e Kosovës në mbledhjen e mbajtur të mërkurën ka miratuar vendim që të ndajë 6 milionë euro shtesë për projektin e ndërtimit të rrugës Prishtinë-Podujevë.
Kryeministri Albin Kurti ka thënë se Ministria e Mjedisit, Planifikimit Hapësinor dhe Infrastrukturës, po vazhdon punimet me intensitet të lartë në këtë rrugë.
“Ministria përgjegjëse për Infrastrukturë është angazhuar që punimet të vazhdojnë me intensitet të lartë, andaj duke e konsideruar dinamikën aktuale të punimeve sjellim para jush për aprovim ndarjen e mjeteve shtesë për këtë rrugë”, ka theksuar Kurti.
Në këtë mbledhje Qeveria ka ndarë edhe mbi 1 milion euro për kompensimin e dëmeve natyrore në bujqësi në komunat Deçan, Gjakovë, Graçanicë, Junik, Kamenicë, Malishevë, Prishtinë, Vushtrri, Gjilan, Lipjan, Novobërdë, Skenderaj, Rahovec dhe Podujevë.
Në këtë mbledhje Qeveria ka formuar edhe Këshilli shtetëror për shënimin e 26-vjetorit të Epopesë së UÇK-së, 25-vjetorin e çlirimit të Kosovës dhe 16 vjetorit të Pavarësisë së Kosovës. Në këtë Këshill kryesues do të jetë Ministri i Kulturës Hajrulla Çeku, ndërsa anëtarë ministrat Donika Gërvalla, Hekuran Murati, Ejup Maqedonci, Albulena Haxhiu, Xhelal Sveçla, Elbert Krasniqi si dhe komandanti i FSK-së, Bashkim Jashari.
Gjithashtu Qeveria ka miratuar propozimet për tre anëtarë të ri të Këshillit Shtetëror të Cilësisë, të Agjencisë së Kosovës për Akreditim.
Për anëtarë në këtë Këshill janë propozuar Mirlinda Batalli – Zhubi, Avni Berisha dhe Jetmir Haxhibeqiri.
Të mërkurën Qeveria ka miratuar propozim-vendimin për rindërtimin dhe renovimin e shtëpive individuale për familjet të cilave u janë dëmtuar shtëpitë gjatë periudhës 1998-1999.
Qeveria ka ndarë edhe mbi 1 milion euro për renovimin e klinikave të Qendrës Klinike Universitare të Kosovës (QKUK).
© KOHA. Të gjitha të drejtat janë të rezervuara.
