Mungesa e Warfarinit, pacientët ankohen në terapitë zëvendësuese
Një hollues gjaku është duke munguar për rreth dy muaj në barnatoret në Kosovë. Pacientët thonë se në mungesë të terapisë antikoagulante Warfarin, janë duke përdorur një bar tjetër që është prodhim nga Serbia, e që, sipas tyre, ka ndikuar negativisht në shëndetin e tyre. Edhe në Qendrën për Transfuzion të Gjakut thonë se Warfarina është terapi më lehtë e menaxhueshme për pacientët
Sadik Veliu është një nga rreth 3 mijë e 500 pacientët me terapi antikoagulante që është në kërkim të terapisë ditore, Warfarin, që prej dy muajsh.
Warfarini, që shërben për hollim të gjakut, mungon në barnatoret e Kosovës, e në vend të tij pacientëve u përshkruhen ilaçe alternative.
Veliu, që është i operuar prej valvulit, thotë se përdorimi i një ilaçi alternativ është duke i ndikuar negativisht në gjendjen shëndetësore.
“Nuk është problem me e gjet, por mua për veti më ka çrregulluar tërësisht. Çdo dytën ditë, të tretën po duhet me shku me i bë analizat, ose shkon niveli shumë lart, ose shumë poshtë bie, problem po kam me drejtpeshim e le më me tjerat”, ka thënë Veliu.
Në laboratorin e hemostazës në kuadër të Qendrës për Transfuzion të Gjakut, ku bëhen matja dhe ordinimi i terapisë antikoagulante, thonë se kjo terapi është jetëshpëtuese për pacientët që kanë probleme me koagulim të gjakut.
Doktoresha Fetije Daciq tregon se Warfarina është shumë më lehtë e menaxhueshme për dallim nga ilaçet e tjera alternative.
“Warfarina është më e lehtë për menaxhim për pacientët me Warfarin për shkak të kohës së eliminimit. Koha e eliminimit të Warfarinës është deri në 36 orë”, ka thënë Daciq.
Ajo këshillon pacientët që, para përdorimit të ilaçeve të tjera, të bëhen matja dhe caktimi i dozës.
“Komponenti aktiv nuk është i njëjtë. U bie pacientëve me ardhë pak më shpesh, çrregullohen, nuk e dinë. Janë zakonisht prej pacientëve më në moshë e marrin me shemën që e kanë përdor për Warfarinë dhe pacientët çrregullohen, fitojnë gjakderdhje, gjakderdhje prej hunde, prej mishit të dhëmbëve, të brendshme... Për atë është një apel për të gjithë pacientët që nuk kanë mundësi me siguru Warfarinën, me ardhë këtu në Transfuzion të gjakut me i këshillu, me iu tregu që zëvendësimi adekuat për Warfarin është edhe Farina. Farina është prodhim i Serbisë, por nëse nuk duan me marrë Farinën, e marrin Sintromin, veç duhet me kalkulu dozën, për shkak se një miligram i Sintromit është ekuivalent me 1.5 deri 2 mlg Warfarin”, ka thënë Daçiq.
Kardiologu i Klinikës së Kardiologjisë, Hamza Selmani tregon se mungesë të këtij produkti, që është edhe pjesë e listës esenciale të barnave, ka pasur edhe në të kaluarën.
“Është ilaç që nuk kanë interes, si duket, kompanitë me e sjellë, se ne jemi treg i vogël dhe ai ilaç nuk është aq me çmim të lartë se janë prodhimet e vjetra edhe Warfarina edhe Sintromi. Edhe si duket nuk po kanë interes kompanitë me e sjellë. Në këto raste ne kemi kërkuar prej Ministrisë që këto të lëshohen me leje speciale të importit. Nuk e di a ka aplikuar ndokush, atë e bëjnë kompanitë farmaceutike për të importuar prej këtij bari. Ky është problem me disa barna që janë më të vjetër se kompanitë po thonë nuk po na e paguan koston e regjistrimit”, ka thënë Selmani.
Në Agjencinë e Kosovës për Produkte dhe Pajisje Mjekësore nuk e kanë treguar arsyen e mungesës së këtij produkti. Kanë thënë se prodhuesi është Bristol Laboratories në Angli dhe se përfaqësues juridik i tyre në Kosovë është kompania “Delta-Healthcare”.
Në këtë kompani thanë për KOHËN se mungesa ka ndodhur për shkak të pamundësisë së prodhuesit që të dërgojë sasi në Kosovë.
“Prodhuesi nuk po mundet që të na dërgojë sasi, për arsye të mungesës së lëndës së parë. Në momentin që sasia arrin, ju informojmë”, kanë thënë nga Delta-Helthcare.
KOHA ka provuar të kontaktojë edhe me kompaninë prodhuese, porse nga ajo nuk ka ofruar përgjigje.
Sqarime nuk dhanë as në Ministrinë e Shëndetësisë, e ndonëse produkti nuk është duke munguar vetëm për të hospitalizuarit, ata bënë përgjegjës SHSKUK-në. E në SHSKUK prej gati një javësh nuk kanë ofruar asnjë përgjigje lidhur me çështjen.
