PSD-ja aksion para Ministrisë së Shëndetësisë, vendos letra higjienike
Foto: Driton Paçarada/KOHA
Partia Socialdemokrate ka mbajtur aksion simbolik para objektit të Ministrisë së Shëndetësisë, duke hedhur letër higjienike e duke vendosur fotografi, siç kanë thënë ,që tregojnë për kushtet e këqija në spitale.
Donjetë Demolli nga ky subjekt ka thënë se ministri i Shëndetësisë, Arben Vitia, ka zgjedhur të mos dalë nga zyra për t’u marrë me problemet në shëndetësi, e për këtë shkak “ia kanë sjellë këto fakte”.
“Pasi që ministri nuk po del nga zyra, kemi ardhur të ja sjellim këto fotografi me fakte për gjendjen në spitalet në vend. Edhe për ta ftuar me pa gjendjen në terren, e kur të sheh gjendjen nuk mundet pa ndërmarrë hapa. Gjendja është shqetësues e banale, aty ku qytetarët shkojnë me u shëruar, ka mundësi me u sëmurë”, ka thënë Demolli.
Anëtarja e PSD-së ka folur edhe për pritjet e gjata për intervenime nëpër spitale dhe mungesën e barnave.
“Ministri nuk e ka përgatitur tenderin për mirëmbajtjen e QKUK-së e spitaleve. Nëse infrastruktura në këtë institucione është e keqe, çka mund të presim. Ka radhë të gjata për intervenime, ka mungesë të barnave, ka mungesë të aparaturave. Ministri po punon që përmes udhëzime administrative që t’i fuqizojë spitale private, ku ka punuar më parë”, është shprehur ajo./eo
