E hëna shënon javën e parë të kthimit të nxënësve në shkolla, porse përgatitjet për sigurimin e teksteve shkollore mund të ngadalësojnë procesin mësimor. Njohësit e arsimit u bëjnë thirrje mësimdhënësve që gjatë kësaj periudhe të gjejnë mënyra alternative të zhvillimit të njësive mësimore sipas plan-programit, ndonëse një gjë e tillë sipas tyre, është vështirë të aplikohet për shkak të kushteve infrastrukturore që kanë shkollat. E Kuvendi i Kosovës nesër do të zhvillojë seancë të jashtëzakonshme për këtë çështje
Sigurimi i librave nga vetë prindërit mund të ndikojë në mospajisjen me kohë dhe përnjëherë të të gjithë nxënësve.
E vonesat në kompletim të teksteve shkollore gjatë muajit shtator, sipas ish-zëvendësministrit të Arsimit, Dukagjin Pupovci, do të ngadalësojnë zhvillimin e plan-programit mësimor.
“Pajisja me libra është shumë me rëndësi, në veçanti për nxënësit e moshave të vogla të cilët në mesin e librave kanë një numër të konsiderueshëm të fletoreve të punës, të cilat duhet t’i plotësojnë si gjatë orëve të mësimit, ashtu edhe si për detyrë shtëpie, prandaj nëse mungojnë këta libra, atëherë me siguri që do të ketë një ngadalësim të procesit mësimor”, ka thënë Pupovci.
Gjatë periudhës së mungesës së librave, Pupovci thotë se duhet të shqyrtohen metoda alternative në ato shkolla që kanë mundësi të improvizojnë.
“Mësimdhënësit duhet të shohin zgjidhje alternative, eventualisht t’i shtypin ato faqet nëse kanë mundësi brenda shkollës, nëse kanë aparate fotokopjuese e kështu me radhë, sepse jo të gjitha shkollat te ne janë të pajisura në mënyrë që efektet negative të mungesës eventuale të librave të minimizohen sa më shumë”, ka deklaruar ai.
Sipas tij, këta libra janë pothuajse të gjitha në dispozicion online.
“Mbetet që të shtypen faqet përkatëse dhe t’u shpërndahen aty ku ka mundësi, aty ku nuk ka mundësi me të vërtetë situata nuk do të jetë e mirë”, ka shtuar ai.
Ministria e Arsimit, këtë vit ka vendosur të shpërndajë ndryshe librat te nxënësit nga klasa e parë deri te e nënta. Ka obliguar prindërit të aplikojnë për subvencion dhe më pas t’i blejnë vetë librat. Procesi ka hasur në kritika të mëdha.
Në të kaluarën, nxënësve deri në klasën e nëntë u shpërndaheshin librat në ditën e parë të vitit shkollor.
Njohësja e çështjeve të arsimit, Salie Osmankaq, thotë se mësimdhënësit do të ketë vështirësi të zbatojnë alternativa bashkëkohore për mësimdhënie, pasi shkollat nuk i plotësojnë kushtet.
“Do të shkaktojë vështirësi patjetër, sepse mësimdhënësit do të detyrohen ndoshta që t’i obligojnë fëmijët të marrin shënime me dorë në mungesë të librave. Do të thotë e ndryshon konceptin ndoshta, ndoshta edhe e përmbysë konceptin e mësimdhënies në shkollë, kjo edhe për faktin se ne e dimë që libri është mjeti bazë që zbatohet sot në shkollë për mësimdhënie, d.m.th. ne as nuk kemi tabletë e as nuk kemi libra elektronikë në të gjitha lëndët siç do të duhej të kishim”, ka thënë Salie Osmankaq, njohëse e çështjeve të arsimit.
E Rinor Qehaja, po ashtu njohës u çështjeve të arsimit dhe drejtues i institutit “EdGuard”, ka theksuar se derisa të gjithë nxënësit të pajisen me libra, nuk duhet që mësimdhënia të mbetet peng vetëm i teksteve shkollore.
“Ngelet pastaj komuniteti i mësimdhënësve që më shumë përkushtim t’i mirëpresin dhe të mos e cenojnë mësimdhënien me tekst shkollore vetëm, deri sa të sigurohen të gjithë nxënësit me tekste shkollore”, ka theksuar ai.
Ky është viti i parë shkollorë ku prindërit janë obliguar t’i blejnë librat, me subvencionim nga Qeveria.
Kuvendi i Kosovës do të zhvillojë të hënën seancë të jashtëzakonshme për librat.
Me ftesë të opozitës, do të ketë debat parlamentar lidhur me furnizimin me tekste shkollore për nxënësit e arsimit fillor dhe të mesëm të ulët.
Ditëve të fundit është bërë tollovi nëpër librari e janë krijuar radhë të gjata nga prindërit të cilët po vazhdojnë kërkimin e teksteve shkollore.
Për këtë ka pasur reagime të shumta nga opozita.
Në LDK kanë thënë se sot në vend që prindërit të kalonin pushimin me fëmijët e tyre, ata po dalin të kërkojnë libra shkollorë në shtëpi botuese.
E kryetari i AAK-së, Ramush Haradinaj, ka postuar një video në njërën nga libraritë në Pejë, ku vërehet një numër i madh i prindërve. Haradinaj ka thënë se kjo gjendje nuk do koment.