Taulant Balla betohet si ministër i Brendshëm i Shqipërisë
Foto: A2N
Taulant Balla është betuar të shtunën si ministri i ri i Brendshëm i Shqipërisë.
Pas ekzekutimit të himnit kombëtar, leximit të dekretit të emërimit dhe formulës së betimit, ministri Balla u betua mbi Kushtetutë para Presidentit të Republikës, Bajram Begaj.
Presidenti Begaj i dorëzoi dekretin e emërimit Ministrit të Brendshëm, duke i uruar suksese në detyrën e re, raportoi TCh.
Kuvendi miratoi dy ditë më parë dekretin e Presidentit të Republikës për emërimin e Taulant Ballës në postin e ministrit të Brendshëm, me 75 vota pro, 16 kundër, 1 abstenim.
Presidenti Begaj dekretoi më 10 korrik emërimin e Taulant Ballës, ministër të Brendshëm.
Balla zëvendëson në këtë detyrë ish-ministrin Bledi Çuçi, i cili u shkarkua nga detyra.
