Skenderi: Bllokimi kamionëve në kufi do të sjellë ngritjen e çmimeve të produkteve
Profesori i makroekonomisë, Nagip Skenderi, ka thënë se tensionet me Serbinë qysh pas shpalljes së pavarësisë së Kosovës, kanë ndikuar në dëm të ekonomisë së vendit.
Ai ka fajësuar edhe Qeverinë për moszhvillimin e ekonomisë. Siç ka thënë ai, “në dekadën e fundit është duke u marrë më tepër me situatën e sigurisë dhe zgjidhjes së problemeve politike, dhe pothuajse e ka harruar në tërësi ekonominë”.
Skenderi pa thënë se situata e fundit me bllokadën e kamionëve në kufi, do të ndikojë në rritjen e çmimeve të produkteve.
“Pasojat e fundit po shihen në gjendjen që është krijuar me bllokadën me maunat në kufi, që të gjitha barten në koston e produkteve dhe kjo sjell si pasojë reflektimin e ngritjes së çmimeve. Po, kemi mungesë të produkteve në treg dhe ato që vinë, vinë me kosto më të lartë për shkak të pagesës në kufi. Tash këto reflektojnë negativisht në gjendjen socio-ekonomike”.
Skenderi në emisionin “60 Minuta” ka thënë se shqetësuese është edhe “derdhja e të rinjve jashtë vendit”, të cilët kanë pritur një vend pune në Kosovë, por “që kanë mësyrë vendet e tjera, sidomos Gjermaninë” për të punuar.
“Tensionet me Serbinë janë në kontekst të sigurisë dhe stabiliteti politik janë shumë të tensionuara dhe raportet me të kanë bllokuar në tërësi ose kanë bërë bllokadë të tërësishme në ekonominë e vendit dhe zhvillimin e përgjithshëm ekonomik. Në kontekst të ekonomisë, në vitin 2007 një vit para pavarësisë kanë qenë investimet direkte të huaja nga jashtë shumë më të larta sesa në periudhën pas pavarësisë”, ka thënë ai.
Skenderi sheh pasoja afatgjata të largimit të resurseve njerëzore. Ai ka theksuar tutje se zhvillimet e fundit në veri të vendit kanë ndikuar në trembjen e investitorëve.
“Të gjitha mosmarrëveshjet politike, sidomos në veri kohët e fundit, i trembi jo vetëm investitorët e huaj që të mos investojnë kapitalin e tyre në tregun e Kosovës, por edhe investitorët potencialë qoftë të huaj apo vendorë e kanë një lloj të sensit të frikës që të vazhdojnë me kapitalin e tyre në Kosovë, sepse një nga parakushtet kryesore për zhvillimin ekonomik dhe investime është stabiliteti politik dhe i sigurisë”.
Ai ka thënë se sa më shpejt të zgjidhen çështjet politike me Serbinë, do të stabilizohet ekonomia.
“Përplasjet politike në veri dhe në kontekst të marrëdhënieve ekonomike ndërkombëtare kanë bërë që ekonomia e Kosovës të pësojë një fiasko. Kjo vetëm që i tremb investitorët, por nuk mund të jetë udhërrëfim për investitorët në të ardhmen që të vinë në Kosovë”, ka deklaruar Skenderi.
