Asociacioni i Gazetarëve të Kosovës ka dënuar sulmin ndaj veturave të KOHËS dhe T7 në Zveçan.

Vetura e ekipit të KOHËS që ka raportuar dje nga Zveçani, është gjetur mëngjesin e sotëm tërësisht e demoluar.

“Në fotografitë dhe videon e publikuar nga mediumi, shihen xhamat e thyer, gomat e shpërthyera, simbole nacionaliste të shënuara në veturë, si dhe pasqyrat i mungojnë. Në të njëjtën gjendje, është gjetur edhe vetura e mediumit T7, e mbuluar me simbole nacionaliste serbe, xhama të thyer, e goma të shpërthyera”, thuhet në njoftim.

Asociacioni i Gazetarëve të Kosovës ka thënë se është thellësisht i shqetësuar me pamjet e dhëna nga këto dy mediume, dhe u ka bërë thirrje të gjithë gazetarëve që të kenë kujdes të shtuar gjatë raportimit.

“Njëherësh, u bëjmë thirrje organeve kompetente që ofrojnë siguri për gazetarët që raportojnë nga këto komuna, si dhe t’i hetojnë me prioritet të gjitha sulmet ndaj medieve që kanë ndodhur gjatë ditës së djeshme”, thuhet në njoftim.

Për sulmet ndaj mediave në komunat veriore të Republikës së Kosovës, ka reaguar edhe Federata Ndërkombëtare e Gazetarëve (IFJ).

“U bëjmë thirrje autoriteteve kompetente t’i mbrojnë gazetarët që të mund të raportojnë pa u ndjerë të rrezikuar”, thuhet në reagimin e IFJ.