Dëshmitari i fundit e Remzi Shala i kundërshtojnë akuzat në rigjykimin për krime lufte
Në Gjykatën Themelore të Prizrenit, të hënën ka vazhduar rigjykimi ndaj Remzi Shalës, i cili akuzohet për krime lufte ndaj popullsisë civile. Në këtë seancë nga mbrojtja është rimarrë në pyetje dëshmitari Blerim Kuqi, i cili procesin ndaj Shalës e ka cilësuar si përpjekje për njollosjen e UÇK-së. Me këtë deklaratë nuk janë pajtuar prokurori dhe avokati i palës së dëmtuar. Vetë Shala ka theksuar se ai si çlirimtar ka mbrojtur popullatën civile.
Me rimarrjen në pyetje të dëshmitarit, Blerim Kuqi nga mbrojtja, të hënën, në Gjykatën Themelore të Prizrenit, është përmbyllur dëgjimi i dëshmitarëve në rigjykimin ndaj Remzi Shalës, i cili nga Prokuroria Speciale akuzohet për krime lufte ndaj popullatës civile.
Në këtë seancë si dëshmitari ashtu edhe i akuzuari i kanë kundërshtuar këto akuza.
Madje dëshmitari Kuqi ka shprehur qëndrimin se aty shihet një urrejtje ndaj Ushtrisë Çlirimtare të Kosovës dhe se qëllimi nuk është dënimi i Remzi Shalës, por njollosja e UÇK-së.
“Edhe sikur Remzi Shala të ishte vrarë në luftë, sot në bankën e të akuzuarve do ta kishim një pjesëtar tjetër të UÇK-së”, ka theksuar Kuqi.
Paraprakisht teksa është përgjigjur në pyetjet e avokatit mbrojtës, Kuqi ka sqaruar se njërin prej dëshmitarëve të mëhershëm në këtë proces, Nuhi Zyrapi, e ka takuar disa herë pas luftës dhe se ai asnjëherë nuk e ka shtruar bisedën për fatin e të ndjerit Haxhi Përteshi.
Lidhur me dëshminë e Kuqit kanë paraqitur vërejtje prokurori special, si dhe avokati i palës së dëmtuar, të cilët i kanë cilësuar si komente pjesën e deklaratës së tij në raport me njollosjen e UÇK-së.
“Këto janë më tepër komente të dëshmitarit, meqë ai nuk u deklarua qartë se qëllimi i kujt është me u dënua këtu tri shkronjat UÇK”, ka deklaruar prokurori special, Haki Gecaj
Ndërsa avokat i palës së dëmtuar Asdren Hoxha ka theksuar se “Në kontekst të komenteve të tij flet për atë se sa subjektiv është ai dhe se pse pres që pikërisht nuk duhet t’i besohet asgjë”.
Pas përmbylljes së pjesës së dëgjimit të dëshmitarëve, i akuzuari Remzi Shala ka kundërshtuar akuzat ndaj tij me arsyetimin se të gjitha ato janë “pallavra” që vijnë si rezultat i problemeve që kanë pasur mes vete anëtarët e familjes Përteshi.
“Unë kam luftuar për vendin tim dhe jam shumë krenar. E kam mbrojtur popullatën civile. Jam vetëm një çlirimtar”, ka deklaruar Shala.
Seanca e radhës është caktuar për datën 7 qershor 2023.
Gjykata Themelore e Prizrenit, në korrik të vitit 2019, pati njoftuar shpalljen e aktgjykimit dënues ndaj Remzi Shalës, për bashkëkryerjen e veprës penale: krime lufte kundër popullsisë civile, duke e dënuar me 14 vjet burg. Mirëpo, pas ankesës së mbrojtjes, Gjykata e Apelit e kishte ndryshuar këtë aktgjykim, duke zbritur dënimin ndaj Shalës në 10 vjet burgim. Ndërkaq Gjykata Supreme, në maj të vitit 2020, e kishte kthyer rastin në rigjykim në shkallën e parë.
