-
Nga:
Valbona Bytyqi
- 19 maj 2023 10:14
- Shpërndaje në:
Kryetari i ri i Mitrovicës së Veriut, Erden Atiq, pritet të bëjë betimin sot (e premte) në orën 11:00 në ndërtesën e kësaj komune.
Kandidati i Lëvizjes Vetëvendosjes, pritet të betohet pasi në zgjedhjet e jashtëzakonshme të mbajtura më 23 prill ku pjesëmarrja ishte vetëm 3.47 për qind, fitoi rreth 66 për qind të votave.
Por ende nuk dihet se kur do të betohen kryetarët e Leposaviqit, Zubin-Potokut e Zveçanit, komuna këto ku gjithashtu u zhvilluan zgjedhjet e jashtëzakonshme lokale të cilat u bojkotuan nga komuniteti serb.
Zgjedhjet u mbajtën pasi që kryetarët paraprakë që vinin nga Lista Serbe, patën dhënë dorëheqje në nëntor të vitit të kaluar.
Në prag të betimit të Atiqit pesë shtetet e QUINT-it – Franca, Italia, Gjermania, Mbretëria e Bashkuar dhe Shtetet e Bashkuara të Amerikës kanë bërë thirrje për mosnxitje të tensioneve në veri të vendit.
Sipas një reagimi, të publikuar në uebfaqen e Qeverisë britanike të enjten në mbrëmje, “nuk është kusht që betimi i kryetarëve të bëhet në zyrat komunale”.
