Arbëri

Liderët opozitarë reagojnë pas arrestimit të drejtorit të KEK-ut

Arrestimi i drejtorit të KEK-ut, Nagip Krasniqi, ka nxitur reagime. Krerët e dy partive opozitare, PDK dhe AAK, kanë thënë se kjo është dëshmi e abuzimit të Qeverisë në sektorin e energjisë.

Kryetari i PDK-së, Memli Krasniqi, ka thënë se për muaj të tërë Qeveria “abuzimet më të mëdha i ka bërë pikërisht në sektorin e energjisë, përmes skemave korruptive dhe keqpërdorimit të pushtetit absolut që e kanë instaluar në këtë sektor”.

Ai ka shtuar se kryeministri Albin Kurti duhet të deklarohet menjëherë për arrestimin e Krasniqit.

“Kryeministri Kurti duhet të deklarohet menjëherë për arrestimin e sotëm të mikut dhe bashkëpartiakut të tij, sepse sot e ka momentin të flasë për bojlera e filtera, që pretendonte se i kupton mirë e që sot po vërtetohet se në emër të tyre janë keqpërdorur miliona euro nga vartësit e tij”.

Krasniqi ka shkruar se abuzimet e Qeverisë me sektorin e energjisë nuk janë të rastësishme dhe as pa dashje. Ai i ka bërë thirrje Prokurorisë që të merret seriozisht me rastin e Nagip Krasniqit.

“Rritja e çmimit të energjisë elektrike për mbi 100% vitin e kaluar, rritja e dytë për 15% para pak ditësh, pagesa në mënyrë joligjore e mbi 100 milionë eurove për faturat e serbëve në veri, bllokimi i ndërtimit të kapaciteteve të reja prodhuese, si dhe shitja e lirë e blerja e shtrenjtë e energjisë – lënë dyshime se janë pjesë e një piramide korruptive të krijuar nga Qeveria Kurti e në krye të së cilës qëndron Ambasadori me aktakuzë i Republikës së Kosovës në Kroaci, Martin Berishaj, i cili është boshti i aferës më të madhe korruptive rajonale të tregtimit të energjisë dhe shpërlarjes së parave”.

“Pas këtyre fakteve të reja, përkundër dëshmive që i kanë dhënë në Komisionin Hetimor Parlamentar, tani po vërtetohen edhe takimet sekrete që Kryeshefi ekzekutiv i KEK-ut, Nagip Krasniqi, i arrestuar sot, kishte muaj më parë me Ambasadorin Martin Berishaj dhe tregtarë të tjerë të energjisë në Zagreb”.

Për arrestimin e drejtorit të KEK-ut, reagoi edhe kryetari i AAK-së, Ramush Haradinaj.

“Kjo çfarë po ndodhë në KEK, është dëshmia më e mirë se lidhjet e shkurtëra janë korrupsioni më i keq!” ka shkruar Haradinaj.


Abdixhiku: Përgjegjësia për mafinë energjetike ka adresë vetë Qeverinë

Edhe kryetari i Lidhjes Demokratike të Kosovës, Lumir Abdixhiku, ka reaguar pas arrestimit të drejtorit të KEK-ut, Nagip Krasniqi.

Sipas Abdixhikut, ka të bëjë me përgjegjësi politike për mafinë energjetike.

Ai ka thënë se përgjegjësia politike për vendosjen, mbrojtjen dhe lejimin e përfitimeve milionëshe është domosdoshmëri, e cila ka adresë Qeverinë.

“Blloku A5 i KEK-ut është jashtë funksionit tash e 10 muaj. Mirëmbajtja e thjeshtë e tij s’do të merrte kohë më shumë se dy muaj. Ishte interes i mafisë energjetike që ky Bllok të mos prodhonte rrymë. Sepse, për aq kohë sa ishte jashtë funksionit, Kosova detyrohej të importonte energji. Vetëm gjatë 11 ditëve të para të prillit, Kosova kishte importuar plot 5.4 milionë euro rrymë. Nuk ka një biznes tjetër, ku 5.4 milionë euro mund të gjenerohen për vetëm 11 ditë. Mjaftueshëm për të mbuluar 45 mijë pensione, apo ndërtuar 9 çerdhe për fëmijë - të djegura për vetëm 11 ditë”, ka thënë ai.