KEK-u synon shtimin e jetëgjatësisë së turbinave të TC “Kosova B” edhe për 20 vjet
Korporata Energjetike e Kosovës (KEK) dhe kompania amerikane “General Electric” (GE) të premten kanë nënshkruar marrëveshje për modernizimin e turbinave me avull të termocentralit
Turbinat me avull të dy blloqeve të termocentralit “Kosova B” pritet të modernizohen, duke ia shtuar jetëgjatësinë edhe për 20 vjet të tjerë. Korporata Energjetike e Kosovës një muaj më parë ka nënshkruar kontratë në vlerë 56.5 milionë euro me kompaninë amerikane “General Electric” dhe projekti do të zgjasë deri më 2025.
Sipas kontratës, punimet për modernizimin e turbinës B2 do të fillojnë në maj të 2024 dhe do të zgjasin deri në qershor. Ato do të kushtojnë 26.1 milionë. Ndërsa punët në njësinë B1 do të fillojnë në maj deri në qershor të 2025 dhe do të kushtojnë mbi 30.3 milionë euro.
Pas një muaji, në ambientet e ndërmarrjes është mbajtur ceremonia zyrtare e nënshkrimit të marrëveshjes, në të cilën ka marrë pjesë edhe kryeministri Albin Kurti. Ai ka thënë se falë kësaj marrëveshjeje kapaciteti i termocentralit do të rritet dhe se, sipas tij, s’do të ketë më nevojë për riparime të shpeshta.
“Kapaciteti i njësive do të rritet nga 13 në 17 megavate. Pasi të kryhen punimet e rindërtimit në turbinat me presion të lartë dhe të ulët, riparimet e shpeshta kapitale nuk do të jenë më të nevojshme, tani ato do të kërkohen vetëm çdo tetë ose nëntë vjet. Në thelb, këto investime do të rezultojnë në rritje të prodhimit që është i krahasueshëm me ndërtimin e një fabrike të re. Rritja e prodhimit do të përkthehet në një pavarësi më të madhe energjetike, duke reduktuar varësinë tonë nga importet”, ka thënë ai.
Kurti ka thënë se termocentrali “Kosova B”, si termocentrali më i ri, ka bartur barrën më të rëndë për furnizim me energji.
“Ceremonia e sotme është një nga hapat kryesorë që po ndërmerren për të hequr atë barrë, për të rritur sigurinë tonë të furnizimit dhe për t'iu qasur sektorit të energjisë me vizion. Është me vend që ne të jemi këtu sot, së bashku me ‘General Electric’, vetë kompaninë që projektoi teknologjinë e termocentraleve tona më 1983 dhe 1984, dhe tani do të bëjë modernizimin e ‘Kosovës B’, për të siguruar që ajo të qëndrojë e fortë për dekadat e ardhshme”, ka theksuar Kurti.
Kryeshefi ekzekutiv i KEK-ut, Nagip Krasniqi, ka thënë se gjendja aktuale e blloqeve është kritike dhe kërkon vëmendje dhe angazhim të menjëhershëm.
“Ky investim do të na lejojë të vazhdojmë me kërkesën në rritje për energji elektrike duke siguruar që termocentralet tona të mbeten efikase dhe të besueshme. Me këtë projekt modernizimi ne po prezantojmë avancimin më të fundit teknologjik në inxhinierinë e termocentraleve për të rritur efikasitetin dhe produktivitetin”, ka thënë Krasniqi.
Sipas tij, me këtë projekt modernizimi do të prezantojnë avancimin më të fundit teknologjik.
“Kjo përpjekje modernizimi do të sigurojë që termocentralet tona të funksionojnë me efikasitet optimal, prodhim më të besueshëm të energjisë elektrike dhe me kosto më efektive. Ky investim madhor do të rrisë kapacitetin e prodhimit për 14 deri në 16 megavate dhe do të zgjasë jetën e dobishme të turbinave për 20 vjet të tjerë dhe do të zgjasë ciklin e jetës së riparimeve të kapitalit nga çdo pesë vjet sa është tani, në çdo tetë deri në nëntë vjet në të ardhmen”, ka theksuar ai.
Drejtori i përgjithshëm rajonal i “General Electric”, Simon Glover, ka thënë se tani është koha për modernizimin e blloqeve.
“Siç u shpreh edhe kryeministri Kurti, tani është koha për të përmirësuar performancën e atyre njësive. Për të rritur efikasitetin e atyre njësive, për të reduktuar emetimet dhe për të respektuar kushtet mjedisore që duhet të përmirësojmë, dhe në fund për të ofruar një aset të vlefshëm që është thelbësor për suksesin e vazhdueshëm të Kosovës si vend dhe KEK si kompani energjetike, korporatë energjetike”, ka theksuar ai.
Ministrja e Ekonomisë, Artane Rizvanolli, ka thënë se me strategjinë për energji që ka kaluar së fundmi në Kuvend planifikohet të kalohet nga qymyri te burimet e rinovueshme.
“Për të realizuar këtë vizion të strategjisë sonë duhet të kemi kapacitete të besueshme dhe më të sigurta të qymyrit dhe për këtë parashikojmë në objektivin e parë të strategjisë rritjen e besueshmërisë dhe sigurisë. Dhe në fakt projekti që po shënojmë këtu sot është një nga aktivitetet kyç që do të garantojë sigurinë dhe besueshmërinë, si dhe pavarësinë energjetike në të ardhmen”, ka thënë Rizvanolli.
Gjatë këtij viti të dy këto njësi do t’i nënshtrohen remontit kapital që do të zgjasë 90 ditë dhe bëhet një herë në pesë vjet. Në kohën kur ato do të jenë jashtë funksionit, Kosova do të ketë rreth 500 megavate më pak energji, gjë që do të shtojë importin dhe do të ndikojë në situatën energjetike në vend.
Dy njësitë e “Kosovës B” kanë filluar të ndërtohen para më shumë se gjashtë dekadash dhe kanë garantuar qëndrueshmëri në sigurimin e energjisë elektrike, pasi kapaciteti i tyre është më i madh se i njësive të TC “Kosova A”, të cilat janë më të vjetra.
