Krasniqi përfaqësuesve të Këshillit Atlantik të SHBA-së: Do të angazhohemi për hartimin e strategjive të mirëfillta politike
Kryetari i Partisë Demokratike të Kosovës, Memli Krasniqi, ka pritur të enjten në takim disa përfaqësues të Këshillit Atlantik të Shteteve të Bashkuara të Amerikës, të cilët ka thënë se i ka njoftuar për qëndrimet e PDK-së në raport me çështjet dhe zhvillimet e rëndësishme që kanë ndodhur në Kosovë.
Nëpërmjet një postimi në Facebook, Krasniqi ka thënë se sfidat politike, ekonomike dhe ato të sigurisë, nëpër të cilat po kalon vendi dhe rajoni, ishin tema për të cilat bashkë i kanë ndarë mendimet dhe qëndrimet e tyre.
“Pas vizitës që kisha në nëntor të vitit të kaluar në selinë e Këshillit Atlantik në SHBA, sot, kisha kënaqësinë që një delegacion të gjerë t’i pres në selinë e Partisë Demokratike të Kosovës në Prishtinë. Përfaqësuesit e Këshillit Atlantik i njoftova me punën dhe qëndrimet e PDK-së në raport me çështjet dhe zhvillimet e rëndësishme që kanë ndodhur në Kosovë. Sfidat politike, ekonomike dhe ato të sigurisë, nëpër të cilat po kalon vendi dhe rajoni ynë – ishin tema për të cilat bashkë i ndamë mendimet dhe qëndrimet tona”, ka shkruar ai.
Krasniqi më tej njoftoi se nëpërmjet bashkëpunimit dhe ideve të përbashkëta, do të angazhohen për hartimin e strategjive të mirëfillta politike në kuadër të vizionit tonë për të ndërtuar një vend më të lirë, më të sigurt dhe më prosperues.
