Shefi i Grupit Parlamentar të Aleancës për Ardhmërinë e Kosovës, Besnik Tahiri, ka ngritur shqetësimin se mijëra zyrtarë publikë po kanë probleme me kompensimin në paga.
Sipas tij, ka dy muaj që Ligji i Pagave ka hyrë në fuqi, ndërkaq nuk dihet saktë se sa është paga për secilën pozitë. Sipas tij kjo ka vetëm se ka sjellë paqartësi, pabarazi, por ka krijuar pasiguri të madhe tek ta.
“Mijëra zyrtarë publikë, edhe dy muaj pas, nuk e dinë sa i kanë pagat, kush merr shtesa, në cilin rangim janë. Kjo, jo vetëm se ka sjellë paqartësi, pabarazi, por ka krijuar pasiguri të madhe tek zyrtarët publikë. Në çdo institucion publik, është krijuar atmosferë e zymtë, diskutimi kryesor është se sa është paga, pakënaqësi e dëshpërim. Vendimmarrësit në vend se të shtrijnë komunikimin, kanë vendosur nga muaji në muaj të nxjerrin një arsyetim”, ka shkruar Tahiri.
Tutje, Tahiri u shpreh se në këtë kohë krize, përtej halleve ditore, kjo paqartësi është nënvlerësim i punës, e siç thotë ai, këtu më së shumti preken profesionistët që po zgjedhin ta lënë sistemin publik.
“Në këtë krizë, përtej halleve ditore, kjo paqartësi është nënvlerësim i punës, e këtu më së shumti preken profesionistët që po zgjedhin ta lënë sistemin publik. Për të arritur një nivel të tillë përgatitje duhet prej 3-5 vjet, e ka raste si në shëndetësi deri në 6-10 vjet. Që i bie, se ne po rrezikojmë funksiononet vitale të sektorëve. Me urgjencë, duhet që të procedohen pagat sipas ligjit, të vendoset komunikim e dialog për të siguruar qëndrueshmërinë e sistemit, e për të parë presionin që po vjen nga trendi i largimit të profesionistëve”, ka shkruar Tahiri.
Edhe këtë muaj, sipas njoftimit të Ministrisë së Brendshme, shtesat për zyrtarët publikë nuk janë ekzekutuar.
© KOHA. Të gjitha të drejtat janë të rezervuara.
