Arbëri

Shakaja e 1 prillit e “KOHËS Ditore” që ende shpërndahet si e vërtetë

Origjina e ditës së gënjeshtrave nuk dihet, por ajo shumë moti “festohet” më 1 prill. Sipas Enciklopedisë Britanike, 1 prilli mund ta ketë dalë nga festa mesjetare e budallenjve, e cila ishte mbajtur dikur.

Gazeta “Koha Ditore” për çdo 1 prill në faqet e saja ka botuar nga një artikull si gënjeshtër e 1 prillit. Të gjithë artikujt në fund të tekstit e kanë pasur të shkruar “Aprilili”, por një artikull i datës 1 prill 2011 në faqen dy bëri bujë të madhe. Fjala është për tekstin “George Washingtoni me prejardhje shqiptare” i cili u bë viral dhe vazhdon të shpërndahet si i vërtetë.

Ende sot pas 11 vjetëve ky shkrim shpërndahet, vetëm se pjesa në fund “Aprilili” i është hequr.

Aty thuhet se “Instituti i Biokimisë dhe i Gjenetikës, me seli në Schafhausen të Zvicrës, ka publikuar rezultatet e hulumtimit më të ri gjenetik të liderëve botërorë, sipas të cilave del se presidenti historik i Shteteve të Bashkuara të Amerikës, George Washington, ka qenë me prejardhje shqiptare. Ndër të tjera citohet edhe “linguisti” Albert Myko.

Sipas linguistit Albert Myko, nga Instituti i Linguistikës pranë Universitetit Berkley të Kalifornisë, SHBA, ekzistojnë dëshmi të tjera që tregojnë se e ëma e George Washingtonit ishte shqiptare. “George Washingtoni ishte i biri i Augustin Washingtonit dhe Mary Ball Washingtonit. Mary në fakt ishte Marije Bala, prindërit e së cilës ishin nga rrethi i Pejës, në Kosovën e sotme. Marija ka lindur në Lively të Virgjinisë, në SHBA, në vitin 1708, por prindërit e saj kanë ardhur aty më 1706, pas një udhëtimi të gjatë me anije që nisi nga Raguza, Dubrovniku i sotëm, dhe i çoi ata përmes Britanisë deri në Tokën e Premtuar, Amerikën”, shkruante në artikull.

Po ashtu në artikullin e KOHËS para 11 vjetëve ishte thënë se ka edhe një amanet të Washingtonit në lidhje me shqiptarët.

“Më kujtohet, kur e mora letrën për t’ia treguar Bill Clintonit në njërën nga intervistat e shumta për libër, dhe i thash, ‘shih, Bill, çka kam zbuluar nga arkivat e Washingtonit’, ai, me të parë letrën, më tha: ‘E kam parë Carl, e kam parë. Mos ta kisha parë, një Zot e di nëse do të kishim intervenuar në Kosovë”, tregon Woodward, i njohur si gazetar, reporter e autor që ka fituar deri tani katër çmime “Pulitzer””, raportohej të ketë thënë autori i njohur amerikan Carl Woodward.