Një delegacion danez ka vizituar Burgun e Gjilanit të mërkurën, për t’i parë hapësirat e burgut dhe mënyrat e funksionimit të tij, njoftoi Ministria e Drejtësisë.
Sipas MD-së, në fokus ishte informimi për delegacionin lidhur me trajtimin e të burgosurve dhe respektimi i standardeve ndërkombëtare.
Kryesuesja e këtij delegacionit, Anne Mette Lyhnr Jensen dhe anëtarët e tjerë vizituan dhomat e pranimit, dhomat e vizitave, njësia shëndetësore dhe hapësira të tjera.
“Gjatë kësaj vizite, delegacioni u shoqëruan nga zëvendësministri Sallahu, anëtarët e kabinetit dhe Shërbimi Korrektues i Kosovës. Me këtë rast, delegacioni danez për së afërmi u njoftua me hapësirat e burgut në Gjilan dhe me mënyrat e funksionimit të tij. Në fokus të veçantë ishte edhe informimi lidhur me trajtimin e të burgosurve pranë këtij burgu i cili është në përputhje me respektimin e standardeve ndërkombëtare”, thuhet në njoftimin e Ministrisë.
Kosova e Danimarka janë pajtuar që 300 të burgosur të vendosen në burgjet e Kosovës, pasi shteti danez po tenton të reduktojë mbipopullimin e burgjeve.
Në dhjetorin e 2021-s, dy shtetet u pajtuan që të merren me qira 300 qeli burgu, në këmbim të një tarife vjetore prej 15 milionë eurosh.
Marrëveshja ka një kohëzgjatje prej dhjetë vjetësh dhe Kosova pritet të përfitojë 210 milionë euro.
© KOHA. Të gjitha të drejtat janë të rezervuara.
