Dëshmitari thotë se e pa Alidemajn në mal, pak ditë para Masakrës së Izbicës
Dëshmitarët, Fadil Thaçi dhe Adem Osmanaj, kanë dëshmuar para Gjykatës Themelore në Prishtinë në rastin në të cilin Muhamet Alidemaj akuzohet për pjesëmarrje në Masakrën e Izbicës më 1999. Dëshmitarët, të cilët deklaruan se kanë qenë ish-ushtarë të UÇK-së, kanë theksuar se nuk e kanë njohur Alidemajn personalisht, porse e kanë takuar para krimit, kur u vranë 147 shqiptarë
Dëshmitarët Fadil Thaçi dhe Adem Osmanaj, ish-pjesëtarë të Ushtrisë Çlirimtare të Kosovës (UÇK), kanë treguar të enjten para trupit gjykues të Gjykatës Themelore në Prishtinë se nuk e kanë njohur personalisht Muhamet Alidemajn, i cili ngarkohet për krime lufte në Masakrën e Izbicës, të kryer në vitin 1999 gjatë luftës në Kosovë.
Alidemaj ngarkohet me dyshimin se ishte pjesëmarrës në masakrën, në të cilin forcat serbe patën lënë të vranë 147 shqiptarë.
Adem Osmanaj ka deklaruar se i është kujtuar fytyra e Alidemajt, pasi që atë e kishte parë në televizor. Osmanaj është bashkëshorti i Xhemile Osmanajt, e cila ka dëshmuar për rastin gjatë muajit të shkuar, duke e identifikuar të akuzuarin si person që e kishte goditur me shpullë.
Ai ka thënë në gjykatë se të akuzuarin e kishte parë në mal 10 ditë para se të ndodhte masakra.
“E kam parë në Vojnikë...I thashë qysh guxove ti të vish këtu e ne me automat (armë automatike) s’guxojmë të dalim nëpër mal, e ti ke dalë këtu. Çka ke dashur këtu? Tha kam sebep (familjarë) dhe kemi shkuar pak më andej, ky përpara e unë mbrapa, pesë a gjashtë metra. E i thashë: ‘Ti djalë, ti je shpiun. Qysh po të them këtu i kam thanë atje. Me e pas ditë që është ky, 100 shpirtra t’i kish pasë, njo s’ja kisha lanë”, ka thënë ai.
Dëshmitari tjetër, Fadil Thaçi, ka rrëfyer se gjatë qëndrimit të tij në një kodër ka parë një grup të forcave të Serbisë, të përbërë prej 20 deri në 30 veta, të cilët lëshoheshin në drejtim të fshatit dhe se një prej bashkushtarëve të tij e ka njohur Alidemajn.
“Islami na tha është Muhamet Alidemaj. Nuk e kom njoftë prej s’largti”, ka thënë Thaçi.
Avokati i të akuzuarit Alidemaj, Milosh Deleviq, i ka pyetur dëshmitarët për atë që e dinë ata lidhur me raportet e dëshmitarit Islam Dani dhe familjes së Alidemajt.
“A keni njohuri që ai ka pasur probleme me babën e Muhamet Alidemajt”, ka pyetur avokati Deleviq.
Dëshmitarët kanë thënë se nuk kanë njohuri mbi raporte të këqija mes dy familjeve.
“Haxhisë ja ka rregullu shpinë, ja ka rregullu kulmin para se m’u arrestu Muhameti”, është përgjigjur dëshmitari Thaçi.
Alidemaj është arrestuar nga Policia e Kosovës në vitin 2021, në Kërminë të Istogut, pasi që është kthyer në shtëpinë e prindërve, pas 22 vjetësh qëndrimi në Serbi.
Mbi të rëndojnë akuzat për krime lufte ndaj popullatës civile, përfshirë pjesëmarrjen në Masakrën e Izbicës. Akuzohet edhe për trajtim çnjerëzor, cenim të integritetit fizik e shëndetit të popullatës civile, për plaçkitje e shkatërrim të pasurisë së popullatës civile, si dhe për pjesëmarrje në zhvarrosjen e kufomave të Masakrës së Izbicës.
