Gjermania ka uruar Kosovën dhe Serbinë për dakordimin në Ohër për aneksin e implementimit të Marrëveshjes bazë të normalizimit të marrëdhënieve.
Nga Qeveria e Gjermanisë është thënë se kjo ndihmon në vendosjen e marrëdhënieve mes Kosovës dhe Serbisë në rrugën e duhur.
“Ju përgëzoj për këtë përparim për të vendosur marrëdhëniet mes Serbisë dhe Kosovës në një rrugë të re. Tash gjithçka ka të bëjë me marrjen e drejtimit për të ruajtur dhe ndjekur atë që është dakorduar. Ne do të jemi me ju që të përmbushni perspektivën tuaj evropiane”, ka shkruar në Twitter zëdhënësi i Qeverisë së Gjermanisë, Steffen Hebstreit.
Po ashtu edhe ambasadori i Gjermanisë në Kosovë, Jorn Rohde, ka vlerësuar këtë marrëveshje.
“Vërtetë, pa vonesa, tash duhet progres i shpejtë në të gjitha çështjet e dakorduara”, ka shkruar Rohde në Twitter.
© KOHA. Të gjitha të drejtat janë të rezervuara.
