ORCA: Ligji për Agjencinë e Akreditimit është “degjeneruar” nga deputeti Ardian Gola
Foto: Alban Bujari/ KOHA
Propozimet e kryetarit të Komisionit për Arsim, Ardian Gola, për Projektligjin për Agjencinë e Kosovës për Akreditim po e degjenerojnë ligjin në tërësi, ka thënë Organizata për Rritjen e Cilësisë në Arsim (ORCA).
Me propozimin e dhënë është hequr limiti kohor në përdorimin e publikimeve shkencore nga bartësit e programeve gjatë procesit të akreditimit.
ORCA ka thënë se e kundërshton këtë lloj abuzimi me fuqinë dhe mospërfillje të gjithë punës së deritashme për draftin origjinal të projektligjit nga ana e kryetarit të Komisionit për Arsim. Ndërkohë, ka hedhur dyshime edhe për ministren e Arsimit.
“ORCA dyshon se kjo nuk do të mund të bëhej e mundur pa bashkëpunimin e Ministres së Arsimit Arbërie Nagavci, cila si sponzorizuese e ligjit ka të drejtë të mos lejojë deviacione të tilla që e deformojnë kualitetin e ligjit e si rrjedhojë cilësinë në arsimin e lartë”.
ORCA ka kërkuar që drafti që vendoset për votim para deputetëve të jetë ai për të cilin ka pasur konsensus shoqëror, të ekspertëve dhe zyrtarëve evropianë që është krijuar në procesin e deritashëm të hartimit të draftit origjinal.
“Tendencat e vazhdueshme të deputetit Ardian Gola mbeten të paqarta për ORCA-n, por të dyshimta gjithsesi. Në fillim i njëjti pat lobuar aktivisht për dobësimin e Këshillit Shtetëror të Cilësisë që shërben si bord i agjencisë, duke provuar që kompetencat për akreditim t’ia delegojë komisionit të ankesave, çka u kundërshtua në një takim publik me Komisionin nga vet Presidenti i EQAR-it, institucion ky prej të cilit Kosova ishte përjashtuar për shkak të ndërhyrjeve politike. Pasi dështoi kjo tentativë që ORCA e sheh si fitimprurëse për sektorin privat të arsimit të lartë, deputeti Gola ka bërë ndërhyrje në draftin origjinal të projektligjit duke ndryshuar nenet që lidhen me akreditimin krahas nivelit të studimeve, gradës shkencore dhe publikimeve shkencore që duhet t’i kenë bartësit e programeve në proces të akreditimit”, ka shprehur ORCA.
Sipas kësaj organizate, qëllimi i Golës ka qenë që t’ia marrë Agjencisë rolin kryesor që e ka në përcaktimin e kritereve të akreditimit.
“Së fundmi deputeti Gola ka ardhur me propozimin që standardet e akreditimit të përcaktohen përmes udhëzimeve administrative nga ministria. Ndërkaq, para kësaj tentative Gola kishte një përpjekje tjetër destruktive krahas ligjit duke provuar t’i betonizojë standardet e akreditimit. Të gjitha këto ndërhyrje janë bërë me qëllim që t’ia marr Agjencisë rolin kryesor që ka e që është përcaktimi i kritereve të akreditimit të cilat përcaktohen ekskluzivisht nga manualet e akreditimit që i nxjerrë Agjencia e Akreditimit, që burojnë nga standardet evropiane të përcaktuara nga ENQA dhe EQAR (standardet ESG)”.
Më tej ka sqaruar se tentativa për fiksim të standardeve apo përcaktim të tyre nga politika është edhe pengim i avancimit të Agjencisë në rrugëtimin e saj drejt anëtarësimit të plotë në ENQA dhe EQAR si dhe përpjekjeve për cilësi në Arsimin e Lartë në Kosovë.
“ORCA rikujton se institucionet publike në përgjithësi, e deputetët në veçanti duhet të afirmojnë dhe mbrojnë interesin publik e jo interesat e grupeve që u përkasin apo bizneseve që mund të kenë lidhje me ta”.
