Krerët e tri shteteve më të fuqishme evropiane – Francës, Gjermanisë dhe Italisë – i kanë shkruar një letër presidentit të Serbisë, Aleksandar Vuçiq, dy ditë para takimit me kryeministrin e Kosovës, Albin Kurti në Bruksel, ka shkruar mediumi publik i Serbisë, RTS, të shtunën në mbrëmje.
Siç raportohet, Presidenca e Serbisë ka pranuar një letër të nënshkruar nga presidenti francez Emmanuel Macron, kancelari gjerman Olaf Scholz dhe kryeministrja italiane Giorgia Meloni.
Përmbajtja e letrës nuk dihet, ka shkruar RTS.
Vuçiqi të hënën pritet të takohet me Kurtin në Bruksel. Aty pritet të merret vendim për propozimin evropian. Palët i kanë thënë po propozimit, ndërsa në Bashkimin Evropian janë shprehur se me pranimin e tij Kosova e pranon Asociacionin, ndërsa në vete propozimi është de facto njohje e shtetit të Kosovës nga ana e Serbisë.
